Máseleniń mánisin «AMANAT» partııasynyń belsendileri anyqtady. Olar 1986 jyly paıdalanýǵa berilgen Sanjar Jandosov atyndaǵy Qaskeleń kásiptik tehnıkalyq kolledjine monıtorıng jumystaryn júrgizdi. 300 orynǵa shaqtalǵan stýdentter úıi 38 jylǵa jýyq ýaqyttan beri kúrdeli jóndeý kórmegen. Qabyrǵalarynyń sylaǵy túsip, jıhazy búlingen bul jataqhanada búginde 50-ge tarta stýdent turady.
«7 mamandyq boıynsha 600-ge tarta shákirtke kásiptik bilim berip otyrǵan irgeli mekemeniń jaı-kúıi syn kótermeıdi. Jataqhana qabyrǵalarynyń sylaǵy túsip, as úı men tazalyq bólmeleriniń tozyǵy jetip tur. Sý júıeleriniń de jaǵdaıy tym nashar. Oǵan qosa, qalanyń qaq ortasynda turyp ınternet jelisine qosylmaǵan», deıdi oblystyq máslıhat depýtaty Ásel Zaırova.
Al kolledj dırektory bilim ordasynda ınternet baryn, tek jyldamdyǵy nashar ekenin aıtyp, aqtaldy.
«Internettiń jyldamdyǵy tómen. Sondyqtan ashylmaı turǵan shyǵar. Negizinde ınternet bar. Materıaldyq baza da jetkilikti. Biraq jańartýdy qajet etedi. Ǵımaratty kúrdeli jóndeýden ótkizýge kópten beri ótinim berip kelemiz. Alaıda, qarjy qarastyrylmaı jatyr», deıdi kolledj dırektory Rústembek Bákirov.
Monıtorıng toby odan ári Qaskeleń mádenıet kolledjine de aıaldady. Mundaǵy stýdentter úıi 55 jyl buryn salynǵan. 2014 jyly kúrdeli jóndeýden ótken. Alaıda, 70 orynǵa shaqtalǵan jataqhana tósekteri tórt aıaǵynan ázer turǵanyn jasyrýǵa bolmaıdy. Tósenisheri de eski, shuryq-tesik. Elektr júıesinde de qaýipsizdik talaptary saqtalmaǵan. Keı tustarynyń ashyq jatqany da baıqalady.
«Stýdentter las tósenishterdi qoldanýǵa májbúr. Biz barǵan qos mekemeniń múshkil jaǵdaıy kópten beri aıtylyp, kóterilip keledi. Bilim basqarmasyna depýtattyq saýal da joldanǵan bolatyn. О́kinishke qaraı, jaýap áli kúnge deıin joq», deıdi amanattyq depýtat Ásel Zaırova.
Monıtorıngtik top músheleri aldaǵy ýaqytta óńirdegi barlyq orta arnaıy oqý oryndaryndaǵy jataqhanalar túgelge derlik tekseriletindigin tilge tıek etti.
