Kollaj: qaz365.kz
Dınara Zákıevanyń aıtýynsha, Almatyda kisi qolynan kóz jumǵan 4 jasar balaǵa qatysty sot prosesi áli júrip jatyr. Al aqpan aıynyń ortasynda Almaty oblysyndaǵy 3 jasar egizder men olardyń úlken ápkesin zorlaý isi boıynsha sot bastalady.
«Qoǵamdy dúr silkindirgen osyndaı qorqynyshty oqıǵalar bir úlken máseleniń, dálirek aıtqanda, áıelder men balalarǵa zorlyq-zombylyq kórsetýdiń, jaqyn adamdar men týystardyń qolynan qaza tabýdyń jıilep ketkenin bildiredi. Kún saıyn qandaı da bir qylmys jasalǵany týraly habarlama alyp, balalar men áıelderge tóngen qaýip pen ádiletsizdikti, azapty kóre otyryp, men áli kúnge deıin turmystyq zorlyq-zombylyqty aqtaýǵa tyrysatyn adamdardyń bar ekenin bilemin», dedi Dınara Zákıeva.
Bala quqyqtary jónindegi ýákil atap ótkendeı, zorlyq-zombylyq áreketterine barǵan adamdardy qatań túrde jazalaý kerek, olarǵa eshqandaı jeńildik te bermeý qajet.
«Saltanat Núkenovanyń isi boıynsha sotqa deıin nemese sot prosesi kezinde sottalýshyny aqtaý maqsatynda naqty faktilerdi qasaqana burmalaýǵa áreket jasalatyny týraly aqparat paıda boldy. Keıbir adamdar «Bıshimbaevty aqtaý naýqanyna» kirisip te ketti. Adamdardyń buǵan qalaı qatysa alatynyn, zorlyq-zombylyqty qalaı ǵana aqtap shyǵatynyn túsiný múmkin emes. Sondyqtan atalǵan is boıynsha sot prosesi ádil ótetinin, jazadan qutylyp ketýge jol berilmeıtinin anyq bildirýimiz kerek», dep jazdy Dınara Zákıeva.
Budan bólek Ombýdsmen zorlyq-zombylyqpen kúres jolynda «zańnyń ústemdigi men quqyq tártibi» qaǵıdatyn qatań ustaný qajet ekenin aıtty.
«El Prezıdentiniń tapsyrmasyna sáıkes biz, depýtattar men memlekettik organdar qyrkúıek aıynyń basynda zań jobasyn daıyndadyq. Bul rette Memleket basshysy zorlyq-zombylyqtyń kez kelgen túrine «múldem tózbeýshilikti» damytý qajet ekenin atap ótti. Bul árqaısymyzǵa da baılanysty. Men óz quzyretimniń sheńberinde sot barysyn jiti qadaǵalaıtyn bolamyn. Biz sanaly qoǵam retinde áıelder men balalarǵa jasalatyn zorlyq-zombylyqtyń ár jaǵdaıynda ádildiktiń jaǵynda bolýymyz kerek», dep qorytyndylady Dınara Zákıeva.
Eske salaıyq, 2023 jyldyń 9 qarashasynda burynǵy Ulttyq ekonomıka mınıstri Qýandyq Bıshimbaev óz áıelin óltirdi degen kúdikke ilinip, qamaýǵa alynǵany belgili boldy.
Keıin Ishki ister mınıstrligi Qýandyq Bıshimbaevqa «Asa qatygezdikpen jasalǵan kisi óltirý» babymen qosa, «Azaptaý» baby boıynsha aıyp taǵylǵanyn habarlady.
