О́ńir basshysy Narıman Tóreǵalıulynyń bastamasymen 2024-2026 jyldarǵa arnalǵan joba aıasynda Oral qalasynan bir kósh aýylǵa bet túzedi. Otaǵasy Aıat Sısenov otbasyly, 5 balasy bar. Balalarynyń ekeýi – mektep jasynda bolsa, úsheýi – odan da kishi. Aıat keıingi 5 jyl boıy Oral qalasynda páter jaldap turǵan eken. Kópbalaly otbasy Qaztalov aýdany ákiminiń shaqyrýyn qup alǵan.
– О́ńirimizde qolǵa alynǵan baǵdarlamanyń maqsaty – azamattardyń aýylǵa kelýin yntalandyrý, halyqtyń kóshi-qonyn azaıtý, aýyldyq jerde jumys kúshi tapshylyǵyn joıý, agroónerkásip keshenin turaqty damytýdy qamtamasyz etý, shaǵyn jáne orta bıznes nysandarynyń sanyn arttyrý, turaqty jumys orny joq qala azamattarynyń, sondaı-aq jas otbasylardyń áleýmettik máselesin sheshýge qoldaý kórsetý. Biz Qaztalov aýdanynyń 8 eldi mekenine adam shaqyryp otyrmyz. Iаǵnı aýdandaǵy Jańatań, Ábish, Kópkútir, Jas, Saryqudyq, Saraljyn, Satybaldy, Kómekshi sekildi shaǵyn aýyldardyń ekinshi tynysyn ashý úshin jyldyń basynda arnaıy jumys toby quryldy. Kóship kelem degen azamattarǵa atalǵan eldi mekenderden jumys, turǵyn úımen qamtý máselesi qarastyrylady. Jumys toby Oral qalasynda turyp jatqan 13 otbasymen sóılesti. Nátıjesinde, 4 otbasy aýylǵa kóship kelýge nıet bildirip otyr. Aıta keteıik, joǵarydaǵy eldi mekenderge jeke ınvestor esebinen úı salý josparlanǵan. Kóship kelýge nıetti azamattarǵa jergilikti demeýshiler esebinen usaq malyn jáne iri qara malyn berý, 1 mln 476 myń teńgege deıin qaıtarymsyz grant alýǵa jáne «Aýyl amanaty» baǵdarlamasy boıynsha nesıe alýǵa bolatyny jóninde túsindirip jatyrmyz, – deıdi Qaztalov aýdanynyń ákimi Aslanbek Sarqulov.
Aıat Bolatulynyń týǵan aýylyna qaıta kóshýi aýdandaǵy erekshe oqıǵaǵa aınalǵan. Aýdan ákimi Aslanbek Sarqulovtyń ózi Oral qalasyna arnaıy baryp, Sısenovter áýletimen júzdesken. Aıattyń aýylǵa qonys aýdarýǵa jáne aýyl ekonomıkasynyń damýyna úles qosýǵa degen izgi nıeti úshin rızashylyq bildirip, naqty kómek beriletinin aıtyp, ýáde bergen.
Sonymen Aıat Sısenovtiń otbasy Jańatań aýylynda birden baspanaly bolady. Otaǵasy aýyldaǵy aýyzsý stansasyna operator, al áıeli mektepke jumysqa ornalasady. Buǵan qosa jergilikti mesenattar erýlik retinde jańa aýyldasynyń qorasyna 2 iri qara jáne 5 qoı kirgizbek nıette.
Batys Qazaqstan oblysy
