Gúlnara – bala shaǵynan I toptaǵy múgedek jan. Bıyl jasy 38-ge keledi. Qozǵalys júıesi, sóıleý múmkindigi damymaǵan. Qyzy únemi kútimdi qajet etetindikten, anasy Qarlyǵash Janaqova janynan shyqqan emes. Udaıy baǵyp-qaǵyp, kishkentaıynan qyzynyń ómiri úshin kúresip keledi.
Anasynyń aıtýynsha, qyzyn jergilikti memlekettik organdar osydan 25 jyl buryn múgedektigi boıynsha turǵyn úı kezegine qoıǵan eken. Alaıda shırek ǵasyr ýaqyttan beri jarymjan jandy qala bıligi tıesili pátermen qamtamasyz ete almaı otyr. Al turyp jatqan eki bólmeli páter – ákesi Júsiptiń atynda.
– Korolev kóshesi, 100 mekenjaıyndaǵy kópqabatty úıde alty jan bir páterdi panalap otyrmyz. Gúlnaram – kishkentaıynan osyndaı múgedek bala. Árdaıym janyndamyn, kútim kerek. Buǵan qosa bizben birge ulym Bektas, kelinim jáne nemeremiz turyp jatyr. Olardyń basqa barar jeri joq. Otaǵasy Júsip zeınet jasynda, ózim bul jaǵdaıda jumys isteı almaıtynym anyq. Saıyp kelgende, tek memlekettiń járdemaqysyna kúneltip otyrmyz. Páterdi de óz betimizben keńeıtýge múmkindigimiz joq. Páter kezegi jyljıtyn emes, – dep muńyn shaqty Qarlyǵash apaı.
Atalǵan másele boıynsha Ekibastuz qalasynyń ákimdigine habarlasyp kórdik. Qala basshysynyń orynbasary Bıbigúl Imanǵalıeva atalǵan azamatshanyń 2013 jylǵy 9 shildeden bastap «I toptaǵy múgedek» sanatymen memlekettik turǵyn úı qorynan baspana alýǵa kezekte turǵanyn rastady.
– 2013 jyly Gúlnara Janaqova №1752 bolyp kezekke tirkelgen eken. 2022 jyly 446-shy bolyp turǵan. Qazirgi ýaqytta kezektegi nómiri – 168. «Turǵyn úı qatynastary týraly» zańnyń 74-babyna sáıkes, memlekettik turǵyn úı qorynan bólinetin páterler belgilengen kezektilik tártibimen turǵyn úı alýǵa muqtajdar esebinde turǵan azamattarǵa beriledi. Bul azamatshaǵa ázirshe kezegi jetpeı úı berý zańǵa tompaq keledi. Ári ol kezekte turǵan ózge jandardyń zańdy quqyqtaryn buzǵanymyz bolar edi, – deıdi B.Imanǵalıeva.
Keıingi jyldary kómirli shahardaǵy múgedekterge páter berý kórsetkishterine kóńil tolmaıdy. 2022 jyly I jáne II toptaǵy múgedekterge 23 páter berilse, ótken jyly nebári 10 múmkindigi shekteýli jan baspanaly bolǵan.
Múgedekterge memlekettik turǵyn úı qorynan páter bólý úrdisi jalpy Ertis-Baıan óńirinde keneýi ketip turǵan másele syndy. О́ńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpovanyń dereginshe, keıingi 10 jylda birinshi, ekinshi top múgedekterine jáne múgedektigi bar balany tárbıelep otyrǵan otbasylarǵa jalpy sany 477 páter berilgen.
Almıra Amanqyzy jalǵyz-aq otbasy ózge páterdi jalǵa alatyn bolsa, jaldaý aqysynyń 50 paıyzyn memleket ótep beretinin jetkizdi.
«2022 jyldan beri elimizde jalǵa beriletin turǵyn úıdi sýbsıdııalaýǵa ótinimder qabyldanyp jatyr. Birinshi jáne ekinshi toptaǵy múgedektigi bar adamdar, múmkindigi shekteýli balalardy tárbıelep otyrǵan otbasylar, jetim balalar, kópbalaly otbasylarǵa turǵyn úıdi jalǵa alý shyǵystarynyń 50 paıyzyn memleket tarapynan óteý qarastyrylǵan. Ol úshin ótinish beretin jerge barý kerek. Mysal úshin ol Ekibastuz qalasynda «Maxi Mall» saýda úıinde, «Otbasy bank» AQ bólimshesinde bar», dep túsindirdi basqarma basshysy.
Osylaısha, bul otbasynyń memlekettiń ýádeli páterin kúte-kúte kúderi úzilgendeı. Qarlyǵash apaıdyń aıtýynsha, naýqas qyzy baryn estigender jaldamaly páterge qabyldamaıdy. Ata-anasy osy ýaqytqa deıin tapqan-taıanǵandaryn qyzynyń densaýlyǵy úshin jumsap tynǵan. Qartaıǵan ýaqytta keń páterge kóship, qyzyna jaıly jaǵdaı jasaımyn degen úmitteri jaqyn ýaqytta oryndalmaıtyn sııaqty.
Pavlodar oblysy,
Ekibastuz qalasy
