Foto: Tengrinews.kz / Turar Qazanǵapov
Tergeý nátıjesine sáıkes, A.Muhamedıulyna asa iri kólemde para alý boıynsha (QK 24-babynyń 3-bóligi – 367-babynyń 4-bóligi), N.Ysqaqovaǵa para alýda deldaldyq jasaýy boıynsha (QK 368-babynyń 1-bóligi), M.Tóleevke asa iri kólemde alaıaqtyq jasaǵany úshin (190-bap, 4-bólim, 2-tarmaq) aıyp taǵylyp otyr.
Aıyptaý qorytyndysynda Muhamedıulynyń 2022 jyldyń jeltoqsan aıynda Astanadaǵy tergeý ızolıatorynda qamaýdan bosatylyp, «Dıplomat» qonaq úıiniń menshiginde qalǵysy kelip, advokat Mustahım Tóleev arqyly sheneýnikterge asa iri kólemde para berýge sheshim qabyldaǵany aıtylǵan.
Kelesi kezekte eks-mınıstrdiń áıeli Nalııa Ysqaqova kafede Tóleevke 140 myń dollardy ózi tapsyrǵan. 2023 jyldyń qańtarynda Ysqaqova bultartpaý sharasyn ózgertkeni úshin Tóleevke taǵy 120 myń dollardy ózi tapsyrǵan. Sáýir aıynda Ysqaqova júrgizýshi arqyly Tóleevke jazasyn jeńildetkeni úshin taǵy 100 myń dollar aýdarǵan.
«2023 jyldyń maýsym aıynda ol uly arqyly advokatqa 27 mıllıon teńge jáne 40 myń dollar kóleminde aqsha aýdarǵan. Mustahım Tóleev bul qarajatty ıemdenip, óz qalaýy boıynsha ıelikten shyǵarǵan», dep habarlady sottyń baspasóz qyzmeti.
Sotta prokýror aıyptaýdy qoldap, Arystanbek Muhamedıulyn 12 jylǵa bas bostandyǵynan aıyrýdy surady. Al Mustahım Tóleevke 6 jyl 8 aıǵa, Nalııa Ysqaqovaǵa 1 jyl 6 aıǵa bas bostandyǵynan aıyrýdy surady.
Sottyń sheshimimen burynǵy mınıstr Arystanbek Muhamedıuly asa iri mólsherde para alýǵa oqtalý jáne osy baptyń 3 jáne 6-bólikteri negizinde kináli dep tanyldy. Astana qalasynyń qylmystyq ister jónindegi aýdanaralyq sotynyń 2023 jylǵy 20 maýsymdaǵy úkimi boıynsha taǵaıyndalǵan onsha aýyr emes jazany sińirý jolymen jasalǵan qylmystyq quqyq buzýshylyqtardyń jıyntyǵy úshin Qylmystyq kodekstiń 58-babynyń 1-bóligi boıynsha qylmystyq is qozǵalyp, odan da qatańyraq jaza taǵaıyndalyp, aqyry 11 jylǵa bas bostandyǵynan aıyryldy. Sonymen qatar memlekettik mekemede qyzmet etýge ómir boıyna tyıym salyndy.
Nalııa Ysqaqova QK 368-babynyń 1-bóligi para alý boıynsha kináli dep tanyldy. Ol 1 jyl 6 aıǵa bas bostandyǵynan aıyrylyp, ómir boıyna memlekettik qyzmette laýazymdardy atqarýǵa tyıym salyndy.
Mustahım Tóleev alaıaqtyq jasaǵany úshin kináli dep tanyldy. Qazaqstan Respýblıkasy Qylmystyq kodeksiniń 190-baptyń 4-bóligi boıynsha 10 jyl merzimge advokattyq qyzmetpen aınalysý quqyǵynan aıyra otyryp, 6 jyl 8 aıǵa bas bostandyǵynan aıyrý jazasy taǵaıyndaldy.
