Sýretti túsirgen – Dmıtrıı Erofeev
Alǵashqy bolǵan is-sharaǵa túrli jastaǵy 500-ge jýyq adam qatysty. «Bul is-sharanyń negizgi maqsaty – buqaralyq sportty qarqyndy damytyp, salamatty ómir saltyn ustaný. О́ńirimizde deneshynyqtyrýmen aınalysatyndardyń sanyn kóbeıtý. Bastamamyzdy qoldap kelgenderge alǵysym sheksiz, kelesi senbide qatarymyz budan da kóp bolady dep oılaımyn», deıdi oblystaǵy buqaralyq-sporttyq is-sharalardy ótkizý ortalyǵynyń dırektory Rústem Qalıev.
Mamandardyń aıtýynsha, tańǵy daıyndyq adamnyń ımmýndyq qabiletin arttyryp, qan aınalymyn retteıdi. Sonymen qatar kúni boıy sergek júrýge septigin tıgizedi.
Ár senbi saıyn ótetin Densaýlyq kúninde tańǵy gımnastıka, tańǵy serýen, túrli sporttyq oıyndarmen qatar ystyq shaı men táttiler de uıymdastyrylǵan. Jınalǵandar arasynda oblystaǵy ardagerlerdi bastap kelgen Ermek Kelimseıit te boldy. Ol «Densaýlyq festıvali» ótetinin estigen bette úıinde jata almaǵan.
«Qalamyzda sportqa degen qoldaý jaqsy. Ásirese úlkender qaýymynyń osyndaı is-sharaǵa qatysyp, jastarǵa úlgi kórsetip jatqandyǵy qýantady. Bul jerde, eń bastysy, árkim óz densaýlyǵyn nyǵaıtyp, salamatty ómir saltyn durys jolǵa qoıýǵa múmkindik alady», deıdi E.Kelimseıit.
Is-shara sońynda belsendiligimen kózge túskender Maqtaý qaǵazdary jáne baǵaly syılyqtarmen marapattaldy. Uıymdastyrýshylardyń aıtýynsha, endi aptanyń ár senbisinde osyndaı buqaralyq sporttyq is-sharalar ótip turady.
Jetisý oblysy
