Kesh bastalar sátte bir mezet únsizdik jarııalanyp, kópshilik Aýǵan soǵysynda qaza tapqan jaýyngerlerdiń rýhyna taǵzym etti. Odan keıin ardagerler sóz alyp, oqýshylarǵa otty jyldardan estelikter aıtty.
«Qazir jurt Aýǵan soǵysy týraly ártúrli áńgime aıtady. Biraq bul – kezinde keńes odaǵynyń quramynda bolǵan elderdiń bárine ortaq qanmen jazylǵan tarıh. Odan endi eshqashan qashyp kete almaımyz. Ol soǵysta qanshama qylshyldap turǵan jigitter qaza tapty. Sizder ol zamannyń qalpy qandaı, adamy qandaı bolǵanyn bilmeısizder. Sondyqtan jańa ýaqyttyń minberinde turyp olar ne úshin qaza tapty, kim úshin, ne úshin soǵysty, sony túsinbeımiz dep aıta salý ońaı. Olar Otan amanatyna adal azamattar boldy. Osyny umytpaýymyz kerek. Eń bastysy, zamanymyz beıbit bolsyn. Oq atylmasyn, bomba jarylmasyn! Sábı jetim, ana jesir qalmasyn! Ol úshin sizder jaqsy oqyp, myqty azamat bolyp shyǵýlaryńyz kerek», dedi Aýǵan soǵysynyń ardageri Erbol Qalıuly.
Kesh qonaqtary mektep oqýshylary ázirlegen konserttik baǵdarlamany, alǵashqy áskerı daıyndyq pániniń muǵalimi Nurtaı Aıtjanov basqaratyn «Jas sarbaz» úıirmesine qatysyp júrgen balalardyń ónerin tamashalady. Jas sarbazdar sapqa turyp, túrli soǵys tásilderin kórsetip, oqý avtomatyn jyldam bólshektep, qaıtyp jınaýdan jarysty.
Kesh barysynda «Otty jyldardyń sabaǵy» atty kitap kórmesi ashylyp, Aýǵan soǵysy týraly qysqa beınerolıkter kórsetildi.
«Aýǵan soǵysynda jáne basqa da qaqtyǵystarda qurban bolǵan ardagerler qurmet pen qoshemetke laıyq. Muny jastar bilýge tıis. Olardyń erlikterin úlgi etý mańyzdy», deıdi mektep dırektory Raǵat Qabylan.
Qostanaı oblysy,
Aısary aýyly
