Oblystyq PD-nyń málimetinshe, 13 aqpannyń borap turǵan keshinde Lısakov qalasynyń turǵyny polısııa bólimine ulynyń joǵalyp ketkeni týraly habarlaǵan. Polısııa joǵalǵan azamattyń boranǵa qaramastan, kúndiz tanysynyń kóligine mingesip Novoılınov aýylyna qaraı shyǵyp ketkenin birden anyqtaıdy.
Keıin belgili bolǵandaı, Novoılınovten qaıtyp kele jatqan kóliktiń jolaýshysy qasyndaǵy júrgizýshimen daýlasyp qalǵan. Sodan ashýlanǵan jolaýshy orta jolda kólikten túsip qalyp, qalaǵa qaraı jaıaý tartyp otyrady. Ashýǵa mingen jolaýshy aqyry adasyp joldan shyǵyp ketken. Qaıta polısııanyń keshikpeı izdeý sharalaryn der ýaqytynda bastaǵany abyroı bolǵan. Áıtpese, tútep turǵan boran taǵy bir jalǵyz jaıaýdyń ómirin jutyp tynýy múmkin edi. Jergilikti polısııa bóliminiń ýchaskelik ınspektory Danabek Igemberdıev pen patrýldik polısııa qyzmetkeri Álibek Júnisov joldan adasqan azamatty qar ústinde jatqan jerinen taýyp aldy.
«Men bul tóńirekti jaqsy bilemin. 3 jyldan beri osynda jumys istep jatyrmyn. Áriptesim ekeýmiz qyzmettik kólikti joldyń jıegine qaldyryp, birtalaı jerdi jaıaý sharlap shyqtyq. Sóıtip júrip joǵalǵan er adamdy qardyń ústinde jatqan jerinen taýyp aldyq. Bir jarym saǵattan astam ýaqyt jatyp qalǵan. Sál keshiksek, uıyqtap ketýi de múmkin eken», deıdi Danabek Igemberdıev.
Tabylǵan azamattyń esh jerin úsik shalmaǵan. Anasy jalǵyz ulyn on eki múshesi saý kúıde din aman qolyna ákep tapsyrǵan polısııa qyzmetkerlerine alǵys aıtady. «Shynymdy aıtsam, ulymdy endi tirideı kóremin be, kórmeımin be degen qorqynysh bılep aldy. Boran bolsa, mynaý. Eshkimniń basyna bermesin. Ulym kólikten túsip qalǵan jerdi dál anyqtap, ketken baǵytyn durys boljaı bilgen, álsirep qulaǵan jerinen taýyp alyp, aman-esen úıge jetkizgen polısııa qyzmetkerlerine alǵysym sheksiz!» deıdi qýanǵan ana.
Oblystyq Polısııa departamenti óńir turǵyndaryn aýa raıyna qatysty habarlamalarǵa muqııat bolýǵa jáne jol qaýipsizdigin qatań saqtaýǵa shaqyrady.
Qostanaı oblysy
