Kórmeniń avtory Mámet Imanbaev shyǵarmashylyǵynda Halyq sýretshisi Ábilhan Qasteevtiń orny erekshe. Ol Ábekeńniń balalyq shaǵyn zerttep, kóptegen kartınalar jazǵan. Tipti zertteýlerin ózek etip, «Armanyna asyqqan Ábilhan», «Ábilhan Qasteevtiń balalyq shaǵy beıneleý ónerinde» atty kitaptar jazdy. Sonymen qatar mozaıkalyq tastarmen, maıly boıaýmen «Qasteev portretteri» atty jáne sýretshi týraly el aýzyndaǵy áńgimeler jelisimen «Týǵan jer tórinde» dep atalatyn týyndylaryn jazdy.
Jalpy, portrettik janrda kóp eńbektenetin sýretshiniń «Dáýlet bı Tanauly», «Shoınaq batyr» syndy tarıhı adamdardy keskindeýmen qatar Qýanysh Sultanov, Áben Dáýrenbekov, Tursyn Ábdireshov, Baıtursyn О́mirbekov, Ermek Kelemseıit, Nıkolaı Golovaskıı, Jaqyp Zamanbekov sııaqty tanymal tulǵalardyń portretterin somdady.
«Onyń týyndylarynyń negizgi taqyryptary – qazaq halqynyń tarıhy. Onyń armany týǵan eliniń, halqynyń san qyrly ári ǵajaıyp tarıhyn kartına arqyly jetkizý edi. Ata-babadan qalǵan mol rýhanı qazynany keler urpaqqa qasterlep qaldyrýdy oılady. Ol ejelgi tarıhymyzdy tereńnen zerdelep, sodan soń ǵana kartına jazý jumysyna kirisetin. Kartınalary tarıhtyń tereńine boılap, rýhqa taǵzym etýdiń jarqyn mysaly», deıdi belgili jýrnalıst Myrzaǵalı Nurseıit.
Mámet Imanbaevtyń ártúrli janrda jasalǵan 20-dan asa týyndysy kórmede bir aı boıy kórermen nazaryna usynyldy. Qylqalam sheberiniń týyndylaryn ónersúıer jurt joǵary baǵalady. Sýretker qorshaǵan ortanyń qatparly tustaryn tereń baıqaıtyn, beıneleý sheberleri ólke shejiresi, óńir peızajy, aýyl kórinisi jáne tarıhı tulǵalardy taqyryp retinde tańdaǵan. Avtordyń shyǵarmashylyǵy kompozısııalyq jáne kolorıttik sheshimderimen erekshelenedi.
Jetisý oblysy
