Foto: mazhilis_kz
«Bul máseleniń qoǵamdyq máni zor. Memleket basshysy Qasym-Jomart Toqaevtyń erekshe baqylaýynda. Osyǵan oraı áıelder men balalardyń quqyǵyn qorǵaý máselesin Prezıdent 2019 jyldan beri ár Joldaýynda turaqty kóterip keledi. Prezıdenttiń negizgi ustanymy – qoǵamda zań ústemdigin ornatý, zańǵa múltiksiz baǵynatyn ádiletti qoǵam qurý.
Osy rette qoǵamda balalarǵa qarsy aýyr qylmystar men zorlaý máselesi erekshe alańdatyp otyr. Sondyqtan Memleket basshysy mundaı qylmystar úshin jazany qatańdatyp, qylmysqa baratyndardy barynsha oqshaý ustaýdy tapsyrdy. Endi jańa zań boıynsha pedofılder túrmeden eshqashan shyǵa almaıdy. Sonymen qatar ótelmegen jańa merzimi de qysqartylmaıdy, raqymshylyqqa ilikpeıdi.
Balalarǵa qarsy jasalǵan aıaýsyz, aýyr qylmystar boıynsha bitimgershilik qarastyrylmaıdy. Turmystyq zorlyq-zombylyq ta ózekti bolyp otyr. Statıstıkaǵa súıensek, áıelder men balalar zorlyq-zombylyqqa jıi ushyraıdy. Jyl saıyn turmystyq zorlyq-zombylyqtan 100-den astam adam kóz jumady. Bul másele de Prezıdenttiń baqylaýynda. О́tken jyly uryp-soǵýdan kóz jumǵan S.Núkenovanyń qazasy qoǵamda rezonans týǵyzdy. Osyndaı qylmysqa jazany qatańdatýdy qoldap ótkizgen onlaın petısııaǵa 150 myń adam qol qoıǵan.
Qasym-Jomart Kemeluly qańtar aıynda «Egemen Qazaqstan» gazetine bergen suhbatynda osy petısııany qoldap, el azamattarynyń pikiri eskeriletinin aıtty. Sonyń negizinde zań qatańdatyldy. Endi uryp-soǵý men densaýlyqqa jeńil zııan keltirý qylmys túri ákimshilik kodeksten qylmystyq kodekske aýystyrylady. Budan bylaı uryp-soǵýdyń jeńil túri bolsa da qylmysker qylmystyq kodeks boıynsha jazalanady. Sondaı-aq azaptaý boıynsha jańa bap qoldanysqa enip, 3 jylǵa deıin bas bostandyǵynan aıyrý jazasy qarastyrylǵan.
Bul máseleni balalar quqyǵy jónindegi ýákil Dınara Zakıevamen júıeli pysyqtap, úkimettik emes uıymdar ókilderiniń qatysýymen Májilis fraksııasynyń otyrysynda jan-jaqty qarastyrdy», dedi depýtat.
E.Beısenbaev bul zań halyqaralyq tájirıbede, TMD elderimen salystyrǵanda eń qatań norma bolyp sanalatynyn aıtty. Zań jobasy Memleket basshysy men qoǵamnyń ortaq kelisimi boıynsha qabyldanǵanyn da eskertti.
