Buǵan deıin 1 500 bas sıyry bar sharýashylyqqa ótken jyldyń qyrkúıek aıynda Estonııa men Nıderlandtan asyl tuqymdy 1 300 bas golshteın qunajyny jetkizilgen. Jaýaptylardyń aıtýynsha, árbiriniń quny 1 mıllıon 358 myń teńge. Al mundaı qomaqty qarjyny sharýashylyq «Qonaev» áleýmettik kásipkerlik korporasııasy (ÁKK) arqyly tómen paıyzben alyp, ıgiligin kórip otyr. Atalǵan sharýashylyqta 210 adam turaqty eńbek etedi.
Memlekettik qoldaýǵa ıe bolǵan sharýashylyq asyl tuqymdy iri qara sanyn kóbeıtý arqyly óńirdiń sút óndirý áleýetin arttyra túspek. Munda sharýalar paıyzy tómen nesıe alýmen qatar 40 paıyzdyq sýbsıdııaǵa qol jetkizedi.
«Asyl tuqymdy mal basyn kóbeıtip, kásipkerlikti keńeıtý maqsatynda 1,8 mlrd teńgege ınvestısııa tartyp, 3,5 paıyzben «Qonaev» ÁKK arqyly lızıngke osy 1 300 basty aldyq. Uryqtanyp kelgen qunajyndardyń jartysyna jýyǵy buzaýlady. Sútti sıyrlardan kúnine ortasha eseppen 24-25 lıtr shamasynda sút saýylady. Osy ýaqytta sút óńdeıtin «Fýd-Master» kásipornyna táýligine 18-20 tonna sút jóneltip otyrmyz. Bolashaqta bul kórsetkishti táýligine 100 tonnaǵa deıin jetkizsek degen oıymyz bar. Sharýashylyq qaramaǵynda Talǵar aýdanynda 800 gektar sýarmaly, sondaı-aq Sheńgeldi massıvinde myń gektarǵa jýyq jerimiz bar. Osy jerlerdi ıgerý arqyly mal azyǵynyń berik qoryn jasap, jemshóppen jetkilikti mólsherde qamtamasyz etip kelemiz», deıdi «Almaty» asyl tuqymdy aýyl sharýashylyǵy kooperatıviniń atqarýshy dırektory Rústem Ahmetjanov.
Talapqa saı jabdyqtalǵan qorajaıda qunarly azyqpen qamtylǵan saýyn sıyrlardyń jas tólderine de aıryqsha kútim jasalyp jatyr.
Ýyzǵa jaryǵan maldyń kúıi jaqsy bolary beseneden belgili. Sol sebepti jańa týǵan buzaýlarǵa alǵashqy onkúndikte sıyrdyń óz ýyzy beriledi eken. Odan keıin úsh ýaqyt 2 lıtrden jylytylǵan sút berip, erekshe kútim jasalatynyn atalǵan sharýashylyqtyń mamany Dıdar Baısýanov tilge tıek etti.
Búginde Talǵar aýdany boıynsha «Amıran», «Baıserke Agro», «Almaty» asyl tuqymdy aýylsharýashylyq kooperatıvi syndy úsh iri sharýashylyqta 7 myń bas asyl tuqymdy saýyn sıyr bar.
«Atalǵan sharýashylyqqa aldaǵy ýaqytta jarty mlrd teńgege deıin sýbsıdııa berý kózdelip otyr. Qazir qujattary ázirlenip jatyr. Memlekettik qoldaýdyń nátıjesinde sharýashylyqtardyń ónim kólemi artyp, irgesi keńeıip keledi. Bul óz kezeginde tabıǵı sút ónimderin óńdeý kásiporyndarynyń qýattylyǵyn arttyrýǵa septigin tıgizeri sózsiz», deıdi Talǵar aýdanynyń ákimi Tanat Aıdarbekov.
Aýdan ákiminiń sózinshe, Talǵar aýdany Nura aýylynda myń basqa arnalǵan taǵy bir taýarly-sút fermasyn ashý josparlanyp, qurylys jumystary bastalǵan.
Buǵan qosa «Alel-Agro» qus fermasyna 285 myń balapan ákelingen. Sonymen qatar sý únemdeý maqsatynda 3 500 gektar jerdi tamshylatyp sýarý ádisine kóshirý kózdelgen. Buǵan deıin onyń kólemi myń gektar shamasynda ǵana ekendigin aıtqan aýdan ákimi aýyl sharýashylyǵy salasyn jandandyrý jumystary jalǵasa beretindigin jetkizdi.
Almaty oblysy
