Foto: gov.kz
Sala basshysynyń aıtýynsha, zań jobasy elimizde qaýipsiz onlaın orta qurýǵa baǵyttalǵan. «Biz zerttegen halyqaralyq tájirıbe kórsetkendeı, jetekshi elder onlaın-jarnamanyń mańyzdy róline jáne ony onlaın-platformalarda kórsetý tetikterine erekshe nazar aýdarady. Sonymen qatar onlaın-jarnamanyń ashyqtyǵyn arttyrýǵa baǵyttalǵan talaptardy kózdeıdi. «Ádilet» portalynda jelidegi jarnamany tańbalaý erejelerin belgileıtin buıryq jarııalandy», dedi Aıda Balaeva.
Mınıstr bul erejeler bızneske áser etý úshin oń baǵalanǵanyn jáne tolyǵymen elimizdiń onlaın segmentinde keń taralǵan qazirgi tájirıbege negizdelgenin atap ótken. Osy erejelerdi qalyptastyrý kezinde kommersııalyq negizde ornalastyrylǵan kontentti óz betinshe belgileıtin medıa-sýbektiler tájirıbesine súıengenin tilge tıek etken ol óz kezeginde osy trendti eldiń búkil ınternet keńistigine taratý jón dep esepteıdi.
Aıda Balaeva osy erejege sáıkes ınflıýenserler (blogerler) kommersııalyq nemese sharttyq negizde ornalastyratyn onlaın-jarnamany tańbalaýǵa tıis ekenin aıtady. Olar jarııalanymnyń basynda nemese sońynda onlaın ortada belsendi qoldanylatyn tómendegideı tujyrymdardyń birin kórsetýi kerek. Mınıstr budan ári «jarnama»; «jarnamalyq materıal»; «seriktestik materıal»; «demeýshilik materıal»; «jarnama quqyǵynda»; «demeýshimen tólengen»; «PR quqyǵynda» sekildi tańbalar tizbesin usyndy.
«Áleýmettik jarnamany (qaıyrymdylyq jáne kommersııalyq emes sıpattaǵy basqa da qoǵamdyq paıdaly maqsattarǵa qol jetkizýge baǵyttalǵan) jáne jedel habar almasý qyzmetterinde (messendjerler) ornalastyrylatyn jarnamany belgileýdiń qajeti joq», dep atap ótti mınıstr.
Aıta ketsek, atalǵan erejeler osy jyldyń 2 naýryzynan bastap kúshine enbek.
