«QazAvtoJoldyń» sońǵy bergen ýádesi boıynsha, byltyr mamyr aıynda «Qaraǵandy – Almaty» tasjoly tolyǵymen bitip, jolaýshylar avtobanmen qatynaýy kerek-tin. Biraq qurylys jumysyna qajet materıal baǵasynyń kúrt ósip ketýine baılanysty merzimi taǵy kesheýildedi. Endi bıyl qarashaǵa deıin támam bolýǵa tıis.
Shynymen, tasjolǵa tóseletin materıaldyń baǵasy eki ese sharyqtap ketipti. Máselen, PS 400-D0 markili portlandsementtiń quny smetalyq qujatta – 16 330 teńge bolǵanda bekitilgen eken. Qazirgi quny – 35 897 teńge turady. Jol qurylys bıtýmy 100/130 markisiniń jobalyq-smetalyq qujattaǵy quny – 106 230 teńge bolsa, búgingi baǵasy – 210 146 teńgege qymbattaǵan. Odan bólek, armatýranyń jobalyq-smetalyq qujattaǵy qunyn 170 310 teńgemen eseptese, ol 376 202 teńgege kúrt kóterilgen.
«Osyǵan baılanysty jobalaý-smetalyq qujatqa túzetýler engizildi. Sonyń saldarynan jumys josparyn taǵy bir jyl shegerýge týra keldi. Bul jaǵdaıdy «QazAvtoJol» UQ aksıonerlik qoǵamy men Indýstrııa jáne ınfraqurylymdyq damý mınıstrligi Avtomobıl joldary komıteti birlese otyryp qarastyrdy. Jobanyń bastapqy quny 248 mlrd teńge bolsa, qazir baǵanyń sharyqtaýynan 317 mlrd teńgege jetip otyr», deıdi «QazAvtoJol» UQ aksıonerlik qoǵamynyń baspasóz qyzmeti.
Búgingi kúnge deıin jumystyń 85 paıyzy oryndalǵan. Qurylys bastalǵaly joldyń astyńǵy topyraq qabaty úshin 36,4 mln tekshe metr materıal tóselgen.
«Iаǵnı 714,8 shaqyrym astyńǵy jáne 719,3 shaqyrym ústińgi topyraqty, qıyrshyq tasty qabattar. Qazir joldyń 701 shaqyrymyna (qarama-qarsy baǵyttardy eseptegende) asfalt jabyndysynyń birinshi qabaty tóselgen. Barlyǵy 720 shaqyrym bolýǵa tıis. Al asfalt jabyndysynyń ekinshi qabaty joldyń 158,6 shaqyrymyna tóselgen. Jol boıynda 4 shaqyrym aınalma joldar ǵana qaldy. Degenmen avtobannyń qarama-qarsy baǵyttaryn bólip turatyn qorshaý men jol belgileriniń joqtyǵyna baılanysty kólik qozǵalysy úshin barlyq tórt jolaǵy birden ashylmady. Tek eki jolaǵyna ǵana júrýge ruqsat etilgen. Osy kúnge deıin 11 kópir salynǵan. Al sý ótkizý qubyrlarynyń jalpy sany 311 bolsa, sonyń 309-y salynǵan. Qalǵan jumystar bıyl aıaqtalýǵa tıis. Qys boıy qurylysqa qajetti materıaldardy daıyndadyq», deıdi «QazAvtoJol» UQ aksıonerlik qoǵamynyń Qaraǵandy oblystyq fılıalynyń resmı ókilderi.
Bilýimizshe, aldaǵy qurylys maýsymyna daıyndyq jumystary júıeli júrip jatyr. Bıyl jumysty mejesine jetkizý úshin 795 jol mamany men 610 tehnıka jumyldyrylady.
Aýyl sharýashylyǵy tehnıkasyna arnalǵan 32 jol ótkeli boıynsha jumys 97 paıyzǵa júzege asty. Balqash qalasyndaǵy jolaıryq aıaqtalyp, Aqsý-Aıýly eldi mekeninen aınalyp ótetin jolaıryq daıyndalyp jatyr. Munymen qosa, Balqash qalasynyń aınalma jolynda temirjol arqyly ótetin jol ótpesi de daıyn. Kelisimshartta qurylystyń aıaqtalý merzimi 2024 jyldyń 30 qarashasy dep kórsetilgen.
Endi jyl sońyna deıin jobanyń oryndalý merzimine jantalasatyn jaýaptylar sapa jaǵyn jyly jaýyp tastamasa deımiz. Degenmen muny «Jol aktıvteriniń ulttyq sapa ortalyǵy» jiti nazarynda ustaıdy. Jaýapty kompanııa tórt jolaqty avtobandy jyl sońyna deıin aıaqtamaı jyr qylsa, onda kóptiń kókeıinde «jolǵa bólingen qyrýar qarjy qolǵa ketti me?» degen kóleńkeli oı týady.
Qaraǵandy oblysy
