Foto: ratel.kz
IIM resmı ókili Shyńǵys Alekeshevtiń aıtýynsha, jedel-izdestirý is-sharalary barysynda izdeýde júrgen qylmyskerler birneshe oblysta ustalǵan. Atap aıtsaq, Abaı oblysynda ustalǵan qylmysker 2018 jyly Almatyda top quramynda aldyn ala sóz baılasý arqyly adam óltirgen. Onyń eki sybaılasy buryn ustalyp, sottalǵan.
Túrkistan oblysynda «Jibek joly» beketinde shekaradan ótpek bolǵan О́zbekstan azamaty ustaldy. Ol 2016 jyly óziniń sybaılasymen birge Reseı Federasııasynyń Máskeý oblysynda úsh adamdy óltirgen.
Jambyl oblysynda kórshi memlekettiń quqyq qorǵaý organdary páterden asa iri mólsherde múlik urlaǵany úshin izdep jatqan taǵy bir ózbekstandyq ustaldy.
Qyzylordada adam urlady degen kúdikke ilingen er adam ustaldy. Aldyn ala málimetter boıynsha, ol 1996 jyly birneshe adammen birge eki adamǵa kúsh qoldanyp, olardy kólikke otyrǵyzyp, belgisiz baǵytta alyp ketken. Bul qylmysqa qatysy bar taǵy bir qylmysker buǵan deıin ustalǵan bolatyn.
Shymkentte polıseıler jergilikti turǵyndy ustady. Er adam tanysyn arzan baǵada janarmaı jetkizemin dep aldap, onyń aqshasyn ıemdengen. Keltirilgen shyǵyn 18 mln teńgege jýyq.
Almaty oblysynda shetel azamatyn uryp-soǵyp, ony pyshaqpen jaraqattaǵan eki er adam ustaldy. Barlyq qylmysker ýaqytsha ustaý ızolıatoryna qamaldy.
Budan bólek, respýblıkanyń krımınaldyq polısııa qyzmetkerleri habar-osharsyz ketken 53 adamnyń ornalasqan jerin anyqtady.
