Foto: gov.kz
Qazaqstanda ýaqytty esepteý máseleleri boıynsha jumys tobyna kirgen Qazaqstan ǵalymdary men sarapshylary Biryńǵaı ýaqyt beldeýin qurýdy usyndy.
Jumys toby 2023 jyldyń sáýir aıynda halyqtyń neǵurlym qolaıly ýaqyt beldeýine kóshý týraly birneshe ret ótinishterine baılanysty quryldy. Oǵan ǵylymı ınstıtýttardyń, medısınalyq joǵary oqý oryndarynyń, ortalyq jáne jergilikti memlekettik organdardyń ókilderi, Parlament depýtattary jáne t. b. kirdi.
Jyl boıy medısına, fızıologııa, geografııa, metrologııa sııaqty túrli baǵyttardy usynatyn jumys tobynyń músheleri Qazaqstan aýmaǵynda qolaıly ýaqyt beldeýin belgileý máselesin zerttedi.
Jumys tobynyń qatysýshylary UTC+5 Biryńǵaı ýaqyt beldeýine kóshý Qazaqstannyń kóptegen óńirleri shynaıy(tabıǵı) ýaqytqa barynsha jaqyn ýaqytty paıdalanatyn eń durys jáne ońtaıly nusqa bolyp tabylady degen pikirge kelisti.
Bul rette jumys toby halyqaralyq tájirıbeni zerdeledi, onyń barysynda biryńǵaı ýaqyt beldeýi álemniń 175 elinde qoldanylatyndyǵy anyqtaldy, al birden kóp ýaqyt beldeýinde nebári 22 memleket turady.
Ýaqyt beldeýiniń aýysýyna qalaı beıimdelýge bolady?
Alǵashqy kúnderi múmkindiginshe uıqynyń uzaqtyǵyn bir saǵatqa uzartqan durys, sonymen qatar durys tamaqtaný rejımin saqtaý kerek (maıly, ashy, ystalǵan taǵamdardy, fast-fýdty, táttilerdi alyp tastańyz), dárýmenderge baı taǵamdardy kóbirek tutynyńyz. Taza aýada kóbirek serýendeý kerek. Ásirese balalar men qart adamdarǵa shamadan tys júktemeni azaıtqan jón. Bul ýaqytta balalarǵa kóbirek kóńil bólgen abzal. Egde jastaǵy adamdarǵa uıyqtar aldynda jeńil serýendeýge, shamadan tys fızıkalyq belsendilikten aýlaq bolýǵa, qan qysymyn baqylaýǵa keńes beriledi.
Poezd ben samoletke qalyp qoımas úshin ne bilý kerek?
Kólik mınıstrligi kórshiles temirjol ákimshilikterimen jáne «Qazaqstan temir joly UK» AQ qatysýshy qyzmetterimen birlesip jolaýshylar poezdarynyń qozǵalys kestesine ózgerister engizý boıynsha jumystar júrgizdi. Jolaýshylar poıyzdarynyń barlyq ózgeristeri resmı saıttar men ınternet-resýrstarda qol jetimdi.
Jolaýshylardy ýaqtyly habardar etý úshin qyzmetkerler arasynda Qazaqstan boıynsha Biryńǵaı ýaqyt beldeýine kóshý kezinde jolaýshylar jáne qala mańyndaǵy poezdardyń júrý tártibi týraly tıisti nusqamalar júrgizilip jatyr.
Jolaýshylar anyqtamalyq aqparatty 1433 nómiri boıynsha «Jolaýshylar tasymaly» AQ biryńǵaı telefon anyqtamalyq qyzmeti arqyly nemese @KTZH_PP_BOT Telegram botynyń kómegimen tegin ala alady.
Azamattarǵa qolaıly jaǵdaı jasaý úshin avıakompanııalar tarapynan avıakompanııalardyń resmı saıttarynda jáne áleýmettik jelilerinde barlyq qajetti aqparattyq qoldaý kórsetedi.
Atap aıtqanda, Air Astana, SCAT jáne Qazaq Air avıakompanııalary avıabıletterdi satý júıelerine barlyq qajetti ózgerister engizdi, sondaı-aq barlyq jolaýshylarǵa tıisti habarlamalar joldandy.
29 aqpan - 2 naýryz aralyǵynda Qazaqstannyń Avıasııalyq ákimshiliginiń jedel shtabynyń negizinde 8 7172 798214, 8 7172 798213 nómirleri boıynsha «jedel jeli» jumys isteıtin bolady. Sondaı-aq reıstiń ózekti mártebesin naqtylaý úshin jolaýshylar áýejaıdyń anyqtamalyq qyzmetterine jáne Air Astana avıakompanııalarynyń Call-ortalyqtaryna kelesi nómirler boıynsha 8 727 244 44 77, 8 7172 58 44 77, 8 702 702 44 77; FlyArystan 8 727 331 1010 (WhatsApp 8 702 702 0227); SCAT 8 7252 99 88 80; Qazaq Air 8 727 356 14 14 júginýi kerek.
Saǵatty aýystyrý kezinde gadjetter men tehnıkany qalaı daıyndaý kerek?
Sıfrlyq damý, ınnovasııalar jáne aeroǵarysh ónerkásibi mınıstrligi azamattarǵa olardy jańartý jáne jańa ýaqyt beldeýine ýaqtyly kóshý úshin ámbebap nusqaýlyqty usyndy.
Bul jańartýlardy almaǵan azamattar olardyń joqtyǵynan alańdamaýy kerek. Qurylǵylardyń baǵdarlamalyq jasaqtamasyn sońǵy nusqasyna deıin jańartý qajet.
Avtomatty jańartý, parametrlerde ýaqytty avtomatty túrde anyqtaý jáne ınternet baılanysy qosylǵan kezde ýaqyt avtomatty túrde ózgeredi, eger joq bolsa – qolmen ózgertý kerek.
Jalpy usynystar
- Internet baılanysyn tekserińiz. Ýaqytty avtomatty túrde jańartý úshin qurylǵy jelige qosylýy kerek.
- Ýaqytty avtomatty túrde jańartýdy qosyńyz. Kóptegen qurylǵylar jelilik ýaqyt qyzmetterin paıdalanyp kún men ýaqytty avtomatty túrde jańartýǵa múmkindik beredi.
- Qurylǵyny óshirip qaıta iske qosyńyz. Keıde ózgeristerdi qoldaný úshin óshirip qaıta qosý qajet.
Operasııalyq júıeler boıynsha nusqaýlyq
Windows
- «Basqarý taqtasy» > saǵat jáne aımaq > Kún men ýaqytty ashyńyz.
- «Internettegi ýaqyt» qoıyndysyna ótip, parametrlerdi «О́zgertý» túımesin basyńyz.
- Internet ýaqytymen «Sınhrondaý» opsııasy iske qosylǵanyna kóz jetkizip, «Qazir jańartý» túımesin basyńyz.
- Eger avtomatty jańartý jumys istemese, Kún men ýaqyt qoıyndysyna ótip, «Kún men ýaqytty ózgertý» túımesin basyp, durys ýaqytty qolmen ornatyńyz.
macOS
- Júıe parametrleri > Kún men ýaqytty ashyńyz.
- Kún men ýaqytty avtomatty túrde retteý opsııasy tańdalǵanyna kóz jetkizińiz.
- Eger qolmen ornatý qajet bolsa, osy opsııany alyp tastańyz jáne qajetti ózgertýlerdi qolmen jasańyz.
Android
- Parametrler > Júıe > kún men ýaqytty ashyńyz.
- Kún men ýaqytty avtomatty anyqtaýdy jáne avtomatty ýaqyt beldeýin qosyńyz.
- Eger avtomatty ornatý jumys istemese, osy opsııalardy óshirip, kúndi, ýaqytty jáne ýaqyt beldeýin qolmen ornatyńyz.
iOS (iPhone ı iPad)
- Parametrler > Jalpy > Kún men ýaqytqa ótińiz.
- Kún men ýaqytty ornatý opsııasy úshin avtomatty túrdi qosyńyz.
- Qajet bolsa, bul opsııany óshirip, durys ýaqyt pen kúndi qolmen ornatyńyz.
Qıyndyqtar týyndaǵan jaǵdaıda
- Amaldyq júıeniń jańartýlaryn tekserińiz. Qurylǵynyń OJ-niń sońǵy nusqasyna deıin jańartylǵanyna kóz jetkizińiz.
- Basqa jelilik ýaqyt qyzmetine aýysyńyz. Keıbir operasııalyq júıelerde balama ýaqyt serverlerin tańdaýǵa bolady.
- Ýaqyt beldeýiniń parametrlerin tekserińiz. Ornalasqan jerińiz úshin durys ýaqyt beldeýi tańdalǵanyna kóz jetkizińiz.
- Jeli parametrlerin tazalańyz. Keıbir qurylǵylarda jeli parametrlerin jańǵyrtý ýaqytty avtomatty túrde sınhrondaý máselelerin sheshýge kómektesedi.
- Qoldaý qyzmetine habarlasyńyz. Eger másele sheshilmese, kásibı kómek qajet bolýy múmkin.
