Jekemenshik mal fermeri Pyqyp budan góri oqyp-toqyǵany bar, kózi ashyq aǵasy Aqalaq aýylǵa ákim bolyp bekigende:
– Kóke, ákim boldyńyz, ákimdigińiz memlekettik qyzmetke jatady, buǵan deıingi «burqyratyp» kelgen syn-minińizge abaı bolyńyz, – dep qalyp edi, aǵasy alara qarap:
– Quldyq psıhologııadan arylar kúniń bolar ma eken seniń! Quldyq quldyraý ana qaramaǵyńdaǵy malshylaryńa ǵana jarasady, – dep alyp, aıda kep lepirme «leksııasyn» oqysyn...
Aýyl jurty da aǵasynyń osy bir minshil qyzba minezin baǵalap, aýdanǵa kelgen jańa ákim el-jurtty jınap aýyldy basqaratyn adamdy ózderine júktegende, biraýyzdan osy Aqalaqty usynyp bekittirip alǵany bar.
Kóp ótpeı aǵasy aýdanda ótken alqaly jıylysta sózin kil synap-mineýge baǵyshtap:
– Quldyq psıhologııadan arylmaı adam bolmaımyz! Bastyq ataýlynyń qısynsyz is-áreketine «lábbaı, taqsyr!» dep bas shulǵyp máńgirip júre bersek, kúnimiz qarań, bolashaǵymyz bulyńǵyr!.. – dep kósilgeninde bul jer shuqyp, jıynnyń artyn kútpeı, birge barǵan aǵasynan buryn aýylǵa jetip alǵany bar.
Ne istesin, óz qolyn ózi kese me... Aıtqan baǵytynan qaıtpaıtyn aǵasynyń qyrsyq minezi bala kezinen bar. Aıtyp kórsin... qaıtarymy aǵyl-tegil bolatynyn biledi. Mundaıda «búkirdi mola ǵana túzeıdi» deýshi me edi.
Aýdandaǵylar da qarap jatpapty, onda da «kóziqaraqtylar» jetip-artylady, alty aılyq qorytyndy boıynsha bulardyń aýlyn syn tezine salyp, Aqalaq aǵasyna sógis arqalatyp jiberipti...
Aǵasy da aıylyn jımaı, kezekti oblystyq basqosýda kıligip sóz alyp, minberden aıda kep kósilipti dep estidi... Onysyn táýelsiz telearna ilip alyp, «ilgeri» ozdyrypty.
Oblys bunysyna «oqyryna» qarap, eki aı ótpeı aǵasynyń «oı-shuńqyryn» qazbalap... ne kerek, qaı-qaıda da bar kemshiliktiń tizbesin tizip, oblys ákiminiń buıryǵymen aǵasyna «qatań sógisti» buıyrtty.
Aǵasy da qarap qalmaı, sary jaǵal basylym bunyń «Quldyq psıhologııa qurdymǵa qulatady» atty kóldeı maqalasyn jarııalap, aıdy aspannan bir-aq shyǵarǵanyn qaıtesiń...
...Bir-aq kúnde «Aýyl ákimi Aqalaq Asabas qyzmetinen bosatylsyn» degen buıryq burq etip, aǵasy «atynan» aýdarylyp túsip, baıaǵy taz qalpyna túse qaldy.
Fermer Pyqyp úıli-jandy Aqalaq aǵasyn bir-aq kúnde taý asyryp, maly jaılaǵan jaılaýdan bir-aq shyǵardy... Sondaǵy qora-qopsyǵa qaraıdy, kezektesip qoı baǵady... Estýinshe, aǵasy sondaǵy eki-úsh qoıshynyń basy qosylǵanda aǵyl-tegil «Quldyq psıhologııa» týraly leksııasyn anda-sanda taý-tasty jańǵyrta oqyp qoıady eken...
Berik SADYR
