«Káýsar» mádenı-tanymdyq birlestiginiń jetekshisi, Memlekettik syılyqtyń laýreaty Kenjeǵalı Myrjyqbaı kesh qonaǵynyń ómir jolymen qysqasha tanystyra kelip, jıynnyń maqsatyna toqtaldy.
«Búgingi keshtiń maqsaty – stýdent-jastarǵa jazýshynyń shyǵarmashylyǵy men eńbek jolyn keńinen tanystyra otyryp, otansúıgishtik pen ultjandylyqqa baýlý jáne rýhanı-adamgershilik qasıetterin damytý», dedi birlestik jetekshisi.
Iá, avtordyń mektep oqyp júrgende jazylǵan «Qyzbeıit», «Qulannyń ajaly» áńgimelerinen bastalǵan shyǵarmashylyǵy oqyrmanǵa keńinen tanys. Synshy retinde de ulttyq ádebıetimizdiń alýan túrli máselesin qamtyp, ózekti jaılaryna toqtalǵan kóptegen maqalasyn oqydyq.
Jazýshy qazirgi qazaq prozasyndaǵy mıfologııalyq saryndar men mıstıkalyq elementterdiń kórkemdik qyzmeti týraly oı bólisip, ádebı úderisterge qatysty pikirin ortaǵa saldy. Balalar ádebıeti, til mádenıeti, ádebıet syny, kitap oqý taqyryptaryna da toqtaldy. Sondaı-aq bilimge umtylýdyń mańyzyn atap ótti.
«Stýdentterdi kórip, ózimniń jastyq shaǵym kóz aldyma keldi. Eń bastysy, bilimge umtylý, qalǵan dúnıe ózi keledi. Bilimniń bastaýy – ustaz. Men Serik Qırabaev, Muhtar Maǵaýın, Nyǵmet Ǵabdýllın, Serik Maqpyruly syndy kórnekti ustazdardan tálim aldym. Bul tulǵalardyń adam bolyp qalyptasýymda, qalamgerlik jolǵa túsýimde orny erekshe. Sizder de Eýrazııa ulttyq ýnıversıtetinde bilim alyp, ustazdaryńyzdyń baǵyt-baǵdarymen úlken jetistikterge jetesizder dep senemin», dedi Asqar Altaı.
Kezdesý aıasynda fılologııa fakýltetiniń stýdentteri Asqar Altaı shyǵarmalarynan úzindiler oqyp, shyǵarmashylyq qabiletin kórsetti. Professor Jantas Jaqyp, aqyn Aıtbaı Sáýlebek, jazýshy Tolymbek Ábdiraıym avtor shyǵarmalary týraly oı bólisti.
Jıyn sońynda stýdenttermen suraq-jaýap sessııasy ótti.
