Úmitimiz – Nadejda

Atalǵan jarystyń tusaýy 1985 jyly kesildi. Sol kezden beri 18 márte uıym­das­tyrylǵan doda tórtkúl dú­nıeniń ár qıy­rynda ótti. Ol básekelerde eń kóp oljaǵa kenelgen – AQSh quramasy. Amerıkalyqtar 231 (101 altyn+63 kúmis+67 qola) júlde olja­lady. Ekinshi orynda – Reseı. Olar 145 (52+48+45) medaldy ıelendi. Sondaı-aq Efıo­pııa, Uly­brıtanııa, Ger­ma­nııa, Iаmaıka jáne Kýba sportshy­lary keminde 15 retten jeńis tuǵyrynyń eń bıik satysyna kóterildi.

Jekelegen jeńil atletter ara­synan Natalıa Nazarova men Marııa Mýtolany aıryqsha atap ótýge bolady. 400 metr jáne 4h400 metrlik estafetada saıysqa túsken Reseı sportshysy 1999-2010 jyldar aralyǵynda qatarynan toǵyz jarysta 7 altyn men 2 qola oljalady. 1993-2008 jyldary óner kórsetken Mozambıktiń jelaıaǵy 800 metrge júgirýde 7 altyn, 1 kúmis jáne 1 qolany enshiledi. Ký­­balyq uzyndyqqa sekirýshi Ivan Pedroso men bolgarııalyq bıik­tikke sekirýshi Stefka Kos­ta­dınova bes retten teńdessiz dep tanyldy.

Qazaqstannyń jeńil atletteri jabyq ǵımarattaǵy álem chempıonatyna san márte qatysty. Al­ǵashqy júldege 1995 jyly qol jetkizdik. Barselonadaǵy bá­sekede Olga Shıshıgına (60 metr­ge kedergiler arqyly júgirý) men Oleg Potapovıch (syryqpen sekirý) kúmis medaldy moınynda jarqyratty. Shıshıgına kýbalyq Alıýska Lopestiń aldyn oraı al­masa, Potapovıch Ýkraınanyń maqtanyshy Sergeı Býbkadan qalyp qoıdy. Esesine joǵaryda esim­deri atalǵan áıgili otandas­tarymyz ýaqyt oza ózderiniń kúmis júldelerin altynǵa almas­tyrdy. Tarqatyp aıtsaq, 1997 jyly Parıjde Potapovıch jáne 1999 jyly Japonııanyń Mae­sabı qalasynda Shıshıgına Qa­zaqstannyń ánuranyn shyr­qatty.

2008 jyly Ispanııada onsaıysshy Dmıtrıı Karpov úshinshi oryndy ıelendi. Dál sol kezderi 24 jastaǵy Olga Ry­pakovanyń dáýiri bastaldy. Úsh qarǵyp sekirýshiler saıysynda ol Valensııada qolaǵa qol sozsa, 2010 jyly Dohada altyn alyp, 2012 jyly Ystanbulda kúmispen kúpteldi. Sodan kelesi júldeni baqandaı 10 jyl kútýge týra keldi. 2022 jyly Belgradta bıiktikke sekirýshi Nadejda Dýbovıskaıa úshinshi orynǵa taban tiredi. Mine, jerlesterimizdiń atalǵan jarysta qol jetkizgen tabystary osyndaı.

Osydan eki jyl buryn Ser­bııanyń astanasynda uıymdas­tyrylǵan sońǵy álem chempıona­tynda AQSh quramasy júl­deler sany jaǵynan barlyq qarsylasynan qara úzdi. Amerıka­lyqtar 19 ret jeńis tuǵyryna kó­terilgenimen, jalpy esepte kósh bastaı almady. Aýyzyn aıǵa bilegen alpaýyt memlekettiń at­letteri Efıopııadan qalyp qoıdy. Qara qurlyqtyń jelmen ja­rysqan jelaıaqtary nebári 9 júldeni qanaǵat tutty. Esesine olardyń medaldary sapaly boldy. Anyqtap aıtsaq, AQSh 3 altyn, 7 kúmis jáne 2 qolany oljalasa, afrıkalyqtar 4 altyn, 3 kúmis jáne 2 qolany qorjynǵa saldy. Sporttyq erejege saı qaı komandanyń altyny kóp bolsa, sol alǵa shyǵady.

Glazgoǵa attanatyn eki sport­shymyzdyń arasynan Nadejda Dýbovıskaıaǵa zor senim artamyz. 25 jastaǵy Semeı óńiriniń týmasy Belgradtaǵy jarystan bólek, Azııa oıyndarynda eki ret jáne qurlyq chempıonatynda bir ret júldeli oryndy ıelendi. Jabyq ǵımarattaǵy Azıadada altynnan alqa taqty. Olımpııa oıyndaryna qatysyp, álem chempıonatynyń fınalısi boldy. Endi Nadejda Glazgoda da barynsha bıikke se­ki­rip, el senimin aqtaıdy dep úmit­tenemiz.

Davıd Efremovtiń de jasy – 25-te. Ol Dýbovıskaıamen birge О́ske­mende irgetasy qalanǵan «Al­taı Atletıks» klýbynda jat­tyǵady. Jerlesimiz byltyr jabyq ǵımaratta 110 metrge kedergiler arqyly júgirýde 7,65 sekýndtyq nátıjemen Astanada Azııa chempıony atandy. Desek te álemdik dodada jeńil atletıkanyń bul túrinde básekelestik óte kúshti. Sondyqtan da Efremovke Glazgoda jeńis túǵyryna kóterilý qıyn bolady.