Mogamed Hamadovıch qazir búkil álemge belgili «Volgogradhımmash» zavodynyń bas dırektory bolyp qyzmet isteıdi. Tanystyǵymyz dostyqqa ulasyp, jaqsy qarym-qatynasta boldyq. Mogamed dosym kezdesken saıyn atasy Álı men ájesi Besırtti 1944 jylǵy aqpannyń qaqaǵan aıazynda shıetteı bes balasymen Semeı stansasynan túsirip ketkende olardy qazaq aǵaıynnyń qamqorlyǵyna alyp, ózderi de joqshylyqtyń taýqymetin kórip júrse de barymen bóliskenin aıtyp otyratyn. Qazaqtyń qýǵyn-súrginge ushyraǵan talaı ult ókiliniń tiri qalyp, urpaǵynyń quryp ketpeýine jasaǵan jaqsylyǵyn tebirene áńgimeleıtin edi. Cheshen jáne ıngýsh halqy Joǵarǵy Keńestiń sheshimimen 1957 jyly aqtalyp, avtonomııalyq respýblıka qurylǵanda Mogamedttiń ákesi Hamad pen anasy Koka 1958 jyly eline oralady. Mogamed Hamaduly 1961 jyly Cheshenstanda dúnıege kelse de, bala kezinen ata-anasynyń qazaqtardyń aq peıili, keń dastarqany men darqan kóńiline rızashylyǵyn estip ósken.
Hamad ata balalaryna kishkentaı kezinen: «Er jetip, azamat bolǵanda qoldaryńnan kelse, Qazaqstanǵa jaqsylyq jasańdar. О́ıtkeni biz sol halyqqa qaryzdarmyz», dep aıtyp otyrady eken. Mogamed Hamaduly áke amanatyn oryndaý maqsatynda Pavlodar oblysynyń aýmaǵynan ónerkásip qaýipsizdigin saqtaý maqsatynda saraptama júrgizetin jáne ónerkásipke serııaly jabdyq, standartty emes jabdyqtardy shyǵaratyn zavodty óz qarajatyna salyp, 2022 jyly iske qosady. Búginde Mogamed Eljýrkaev basqaratyn «Volgogradhımmash» mekemesi – elimizdiń basqa da munaı, gaz óńdeý zaýytynyń tapsyrysymen tıisti bólshekter men jabdyqtardy daıyndaıtyn seriktes.
Ár adamnyń taǵdyry – muhıt sııaqty tereń de alýan túrli. Úlken dastan dersiz. Sol sııaqty dosym Mogamed Hamadulynyń ata-ájesiniń, áke-anasynyń basynan ótkergen qıly taǵdyry – júrek tebirentetin, óz aldyna bólek, úlken tarıh.
Qıyn-qystaý dáýirde, tar jol taıǵaq keshken zamanda demeý bolyp, urpaǵy joq bolyp ketýge taıaý qalǵan shańyraqqa qolushyn sozǵan eldi, jerdi umytpaı balalaryna qazaq halqynyń qandaı ekenin qulaqtaryna quıyp, júrekterine jetkizip ketken Eljýrkaev áýletine bizdiń de alǵysymyz sheksiz.
Ersultan BEKTURǴANOV
Qoǵam qaıratkeri
