Buǵan deıin atalǵan is QR Qylmystyq kodeksiniń 99-baby, 1-bóligi (kisi óltirý) boıynsha qaralǵan bolatyn. Bul bap 8 jyldan 15 jylǵa deıingi túrme jazasyn kózdeıdi. Istiń «Asa qatygezdikpen kisi óltirý» baby boıynsha qaıta saralanýy kúdiktige beriletin jazany aıtarlyqtaı aýyrlatady: endi ony 15 jyldan 20 jylǵa deıin bas bostandyǵynan aıyrý nemese ómir boıyna túrmege kesý jazasy kútip tur.
Advokattyń aıtýynsha, is boıynsha baptyń ózgerýi jábirlenýshi taraptyń tabandy jumysy men ádildikke qol jetkizýge talpynysynyń nátıjesi boldy.
«Bul – ádildikke jetý jolyndaǵy atqarylǵan jumystyń qorytyndysy», dedi Aıanhan Omarov.
Sondaı-aq advokat Shymkent qalalyq polısııa departamentiniń tergeý jumysy boıynsha jańa taǵaıyndalǵan orynbasary Erejepov pen tergeý basqarmasynyń basshysy Qulmahanǵa isti formalızmsiz, jan-jaqty qaraǵany úshin rızashylyǵyn bildirdi.
Jábirlenýshi taraptyń málimeti boıynsha, kúdikti Nuraıǵa qysym kórsetken. Qyz nekelesýden bas tartqan soń, kúdikti ony qýdalap, keıin erekshe qatygezdikpen óltirgen. Osy jaǵdaıdan keıin Shymkent qalalyq polısııa departamentiniń basshysy Nurlan Almasbekov pen onyń birinshi orynbasary Qurmanbek Sahov qyzmetinen bosatyldy.
Prezıdent te jaǵdaıǵa nazar aýdaryp, quqyq qorǵaý organdarynyń áreketterine prınsıpti baǵa berý qajettigin aıtty jáne tergeýdiń ádil júrgizilýin qamtamasyz etýdi tapsyrdy.
