Joba aıasynda týa bitti jáne hromosomalyq patologııalary boıynsha táýekel tobyndaǵy Almaty qalasynyń júkti analary ishtegi sharananyń densaýlyǵyn anyqtaıtyn negizgi tekserýden óte alady. Zertteý Fetal Medicine Foundation prenataldyq dıagnostıka jónindegi jetekshi eýropalyq uıymnyń algorıtmi boıynsha bir kún ishinde, zamanaýı jáne óte dál dıagnostıkalyq jabdyqtarda – ımmýnohımııalyq taldaǵysh pen qýatty mıkroskopta júrgiziledi. Buǵan deıin mundaı zertteý keıbir jekemenshik ortalyqtarda ǵana bar bolatyn.
«Bizdiń ortalyqta paıda bolǵan prenataldy skrınıngtiń jańa ádisi asa jyldamdyǵymen erekshelenedi: barlyq tekserýler bir kúnniń ishinde júrgizilip, aıaǵy aýyr áıelderge zertteý nátıjelerin jyldam ári barynsha dál alýǵa múmkindik beredi. Ortalyqtyń AYALA qaıyrymdylyq qorymen tıimdi yntymaqtastyǵynyń, sonyń ishinde memlekettik medısınalyq kómek sheńberinde biz dıagnostıkalaýmen emdeýdiń eń zamanaýı ádisterine qol jetkizip otyrmyz», deıdi Almaty qalasynyń Perınatologııa jáne balalar kardıohırýrgııasy ortalyǵynyń dırektory Gúlnara Nurlanova.
Mundaı prenataldy skrınıng júktiliktiń 12 aptasyndaǵy jatyrdaǵy uryqtyń damýyndaǵy yqtımal, týa bitti anomalııalardy anyqtaýda sheshýshi ról atqarady. Jańa ádis dárigerlerge ımmýndyq-hımııalyq taldaý, uryqtyń hromosomalyq aýytqýlaryn sıtogenetıkalyq zertteý arqyly keselderdi der kezinde anyqtaýǵa, júktilikti júrgizýde durys sheshim qabyldaýǵa kómektesedi.
«Qazaqstanda balalardyń múgedektigin azaıtý – QR Densaýlyq saqtaý mınıstrligi úshin de basty mindetterdiń biri. Biz búgin elimizdiń týý kórsetkishi joǵary basqa aımaqtarynda jalǵasyn tabatyn alǵashqy «Bir kún klınıkasy» jobasyn bastadyq. Almaty qalasyndaǵy PjBKHO-na berilgen ımmýnohımııalyq taldaǵysh Nobel syılyǵyna ıe bolǵan biregeı tehnologııa negizinde ázirlengen. Osy taldaǵyshta prenataldyq skrınıng úshin paıdalanylatyn markerler búkil álemdegi «altyn standart» bolyp esepteledi. Innovasııalyq qural-jabdyqqa qol jetkizýge kómek qolyn sozǵan «Shevron» kompanııasyna da elimizdiń bolashaq azamattarynyń genetıkalyq densaýlyǵyn nyǵaıtýǵa qosqan zor úlesi úshin alǵysymyzdy bildiremiz», dedi Densaýlyq saqtaý mınıstrligi Ana men bala densaýlyǵyn qorǵaý departamentiniń dırektory Maǵrıpa Hamıtova.
Sonymen Perınatologııa jáne balalar kardıohırýrgııasy ortalyǵynyń dárigerleri tek 2024 jyly 10 myń júkti áıeldi prenataldy skrınıngten ótkizýdi josparlap otyr.
«Mine, 15 jyldan beri biz AYALA Jeke qaıyrymdylyq qorynyń perınataldyq jáne neonataldyq dıagnostıkanyń ózekti máselelerin sheshýge, ishtegi sharana men jańa týǵan nárestege sapaly medısınalyq kómek kórsetýge, perınataldyq jáne neonataldyq ortalyqtardy materıaldyq-tehnıkalyq qamtamasyz etýdi jaqsartýǵa, sondaı-aq neonatolog dárigerler men orta medısınalyq qyzmetkerlerdiń biliktiligin arttyrýǵa baǵyttalǵan jobalaryn qoldap kelemiz. Bul elimizdegi sábılerdiń shetineýin azaıtýǵa, jastaı múgedektiktiń aldyn alýǵa yqpal etedi dep senemiz», deıdi «Shevron» kompanııasynyń áleýmettik ınvestısııalar jónindegi úılestirýshisi Janar Qoshpanova.
О́z kezeginde 17 jyldan beri perınataldyq balalar medısınasynyń alǵa jyljýyna aıtarlyqtaı úles qosyp kele jatqan AYALA Kaıyrymdylyq qorynyń negizin qalaýshy jáne prezıdenti Aıdan Súleımenova: «Bizdiń elimiz úshin bul másele áli de kókeıkesti kúıinde qalyp otyr. Jyl saıyn Qazaqstanda týabitti nemese tuqym qýalaıtyn keseli bar 3500-ge jýyq bala dúnıege keledi. Jyl saıyn múmkindigi shekteýli mektep jasyna deıingi balalardyń sany 6 myńǵa kóbeıip keledi. Týǵannan bastap, 18 jasqa deıingi 100 myńnan astam bala múgedektikke shaldyqqan. «Bir kúndik klınıkanyń» ashylýy perınatologııany damytýda jáne Qazaqstanda júkti áıelderge sapaly medısınalyq kómekti qamtamasyz etýde mańyzdy qadam bolyp otyr. Bolashaq analarǵa keshendi skrınıngtik zertteý júrgizýdiń jańa tásili tıimdi qural bolatynyna senimdimin», dedi.
