Ábıba Tashkentte kúmis aldy

Asa jeńil salmaqtaǵy Ábı­ba bastapqy básekelerde túrik­menstandyq Gúzel Inamova men ızraıldik Tamar Malkany utsa, ile-shala álem chempıonatynyń qola júldegeri, Panamerıka chempıony, amerıkalyq Marııa Selııa Labordeden aılasyn asyrdy. Jartylaı fınalda onyń joly shvesııalyq Tara Babýlfatpen qıysty. Osydan eki apta buryn Bakýde ótken týrnırde qazaq balýany dál osy sportshyǵa ese jiberdi. Sol jarysta 18 jas­taǵy Skadınavııanyń sulýy altynnan alqa taqty. Bul joly Ábýjaqynova Babýlfattan basym túsip, Kaspıı jaǵalaýynda ketken esesin qaıtardy. Fınalda jerlesimiz eki dúrkin Eýropa birin­shiliginiń qola júldegeri Sábına Gılıazovamen kúresti. Reseıdiń ókili úshinshi aınalymda bizdiń Ǵalııa Tynbaevany tize búktirgen edi. О́kinishke qaraı, onyń da tatar balýanyna áli jetpedi. Sóıtip, Ábıba Ábýjaqynova qatarynan úshinshi jarysynda júlde aldy. Tashkentte oǵan kúmis medal buıyrdy.

Erler arasynda 60 kg salmaqta kúsh synasqan Eldos Smetov ký­balyq Djonatan Sharondy shań qap­tyryp, odan keıin álem chempıony, Eýropa oıyndarynyń jeńimpazy, grýzııalyq Lýhým Chhvı­mıanımen sheberlik baıqas­ty. Bul báseke de Eldostyń paıdasyna sheshildi. Shırek fınalda qazaqtyń uly álem chem­pıonatynyń qola júldegeri Geo­r­gıı Sardalashvılımen sa­ıysqa tústi. Báseke barysynda Sme­tov grýzın jigitiniń moınyn buraǵany úshin jarystan shet­tetildi. Ruqsat etilmegen ádis qol­danýynyń kesirinen ol jubanysh bel­desýine de qatysa almady. Osy salmaqtaǵy Nurqanat Serik­baev tájik Mehzod Sýfıevke san soq­tyrǵanymen, reseılik Aıýb Blıevten utyldy. 66 kg sal­maq­taǵy Ǵusman Qyrǵyzbaev qyr­ǵyz Qubanyshbek Aıbekulyna jáne Janarys Rahmetqalı ızraıl­dik Barýsh Shmaılovqa jol berdi.

Kelesi kúni 73 kg salmaq dá­re­­jesindegi Danııar Shamshaev qyr­ǵyz Shyńǵyshan Saǵynǵalı men slovenııalyq Marın Hoıaktyń aıa­ǵyn kókten keltirip, shırek fı­­nalda Gran-prı jáne Grand-Slem týrnırleriniń tórt dúrkin jeńimpazy, reseılik Mahmadbek Mah­madbekovtiń mysyn basty. Jartylaı fınalda Shamshaevtyń joly taǵy bir Reseı dzıýdoshy­symen qıysty. Biraq Danıl La­vrentevke onyń áli jetpedi. Qola medal úshin básekede qan­­dasymyz álem men Azııa chem­pıonatynyń qola júldegeri, óz­bek Obıdhon Nýmanovpen kú­resti. Bul aıqasta tóreshiler Da­nııarǵa kópe-kórineý qııanat jasady. Báseke barysynda qarymta shabýylǵa shyqqan qazaq dzıýdoshysy qarsylasyn keýdesinen asyra laqtyrdy. О́zbektiń óreni qulaǵan kezinde qolyn tatamıge tiredi. Sonyń kesirinen ol ja­raqat aldy. Bul jerde Nýmanovqa qatań eskertý berilýge tıis edi. О́ıt­keni kúrestiń qaı túrinde de qulap bara jatyp, qoldy kilemge tireýge bolmaıdy. Al tóreshiler bolsa, jazyǵy joq Danııardy jazalady. Nátıjesinde, tatamı qojaıyny qola medaldi ıelense, bizdiń jigit besinshi orynda qalyp qoıdy.

81 kg salmaqtaǵy Suńǵat Ju­bathannyń reseılik Davıd Ka­rapetıan men marokkolyq Ahraf Mýtııden mereıi ústem bol­ǵa­nymen, ázerbaıjandyq Rad­jablı Omardyń osal tusyn taba almady. Jubanysh beldesýinde ol álem jáne Eýropa chempıo­ny, Eýropa oıyndarynyń je­ńim­pazy, komandalyq esepte Olımpıadanyń qola júldegeri, ızraıldik Sagı Mýkıden ótti. Úshin­shi oryn úshin saıysta Suń­ǵat japonııalyq Takanorı Nagasemen aıqasty. Tokıo Olım­pıadasynyń jeńimpazy, Rıo Olımpıadasynyń qola júldegeri, álemniń úsh dúrkin chempıony degen dardaı ataǵy bar apaıtóske Jubathannyń shamasy kelmedi.

Al Asqar Narqulov (73 kg) pol­shalyq Adam Stodolskı jáne Rýslan Musaev (81 kg) ózbek­stan­dyq Nurbek Murtozoevtan utylyp, jarysty merziminen buryn aıaqtady. Sol sekildi Arý­jan Erejepova, Balnur Ábde­shova (52 kg), Baqyt Qusaqbaeva (57 kg), Esmıgúl Kýıýlova, Krıstına Sotnıkova (63 kg) jáne Ekaterına Sotnıkova da (70 kg) el senimin aqtaı almady.