T.Ábildaev jyl saıyn medısınalyq saqtandyrý esebinen kardıohırýrgııa, neırohırýrgııa, ýrologııa, travmatologııa, onkologııa, hırýrgııa sııaqty basqa profılder boıynsha myńdaǵan operasııa jasalatynyn aıtty. Mundaı operasııalar kúrdeliligine baılanysty kúndelikti qala emhanalary men ǵylymı ortalyqtary deńgeıinde de oryndalýy múmkin.
«Mysaly, 2023 jyly MÁMS arqyly 134 myńnan asa operasııa jasalyp, oǵan 78 mlrd teńge tólengen. Onyń ishinde joǵary tehnologııalardyń kómegimen jasalatyn operasııalar men manıpýlıasııalarǵa qor 21,7 mlrd teńge tóledi. Saqtandyrylmaǵan azamattar osyndaı operasııalardy jasatatyn bolsa, qaltasynan birneshe mln tólegen bolar edi», dedi T.Ábildaev.
О́tken jyly Almaty qalasynda 1 841 kardıohırýrgııalyq operasııa, 562 neırohırýrgııalyq operasııa, lor-profıli boıynsha 250 operasııa jasalǵan.
«Keıingi kezde artroz, artrıt syndy býyn aýrýlarynyń kóbeıýine baılanysty tize, jambas býyndaryn almastyrýshylar sany kúrt kóbeıgeni belgili. 2023 jyly almatylyq travmatologter osyndaı 4 670 operasııa jasaǵan. Oǵan MSQ 6,9 mlrd teńge tóledi», deıdi fılıal dırektory.
Sonymen qatar aǵza almastyrý operasııalary da MÁMS paketi arqyly qarjylandyrylady. 2023 jyly quny 565,6 mln teńgeden asatyn 95 transplantasııa jasaldy. Mundaı bir ǵana operasııanyń ózi orta eseppen alǵanda 7-9 mln teńge turady. Osy qyzmetterdiń bárin saqtandyrylǵan azamattar MÁMS arqyly qıyndyqsyz paıdalanyp keledi.
Bıyl Almaty qalasy densaýlyq saqtaý salasynyń bıýdjeti 334,2 mlrd teńgeni qurap otyr. Onyń 158,5 mlrd teńgesi MÁMS paketine tıesili. Fılıaldyń baspasóz qyzmeti taratqan habarlamaǵa súıensek, qazirgi tańda qor byltyr qala turǵyndaryna kórsetilgen medısınalyq qyzmet aqysyn tolyq tólep boldy. Barlyq emdeý mekemesi avans aldy.
«2024 jyly ońtústik astanalyqtar medısınalyq kómekti 213 emdeý mekemesi arqyly ala alady, onyń 122-si – jekemenshik. Bıyl qyzmet kórsetýshiler sany jańa on klınıkamen tolyqty. Olardyń deni – bastapqy medısınalyq-sanıtarlyq kómek kórsetetin mekemeler, ıaǵnı emhanalar men stomatologııalyq klınıkalar. Bul tizimmen fms.kz saıty arqyly tanysýǵa bolady», dep atap ótti T.Ábildaev.
Bıyldan bastap qor men medısına uıymdarynyń jumysynda kóptegen úderis ońtaılandyryla bastady. Birinshiden, qarjyny medısına uıymdary arasynda bóliske salý isi tolyǵymen avtomattandyryldy. Bul qarjylandyrýdy barynsha tezdetýge múmkindik beredi.
«Memleket basshysynyń tapsyrmasy boıynsha Biryńǵaı qyzmet paketin kezeń-kezeńmen qalyptastyrý jumystary qolǵa alyndy. Qazirdiń ózinde úsh nemese odan da kóp kelisimsharttyń ornyna bir kelisimshart, qos qarjylandyrý kóziniń ornyna bir pýldy paıdalaný jobasy júzege asyrylyp jatyr. Bul basy artyq qaǵazbastylyqtan aryltyp, ásirese dárigerlerdiń jumysyn jeńildetedi. Munyń pasıentterge keri áseri bolmaıdy, olar medısınalyq kómek túrlerin burynǵysha paıdalana bermek», dedi fılıal dırektory.
ALMATY
