Ýnıversıtettegi Rekrýtıng jáne mansap ortalyǵynyń jetekshisi Berik Saımaǵambetov otyrystyń maqsaty týraly aıtyp, «Syr medıa» JShS dırektorynyń mindetin atqarýshy Marat Aralbaev seriktestiktiń qazirgi jaı-kúıi, el damýyna úles qosyp kele jatqan jýrnalısterdi shyǵarmashylyq turǵyda qoldaý baǵytyndaǵy bastamalar týraly habarlama jasady.
Byltyrdan beri saraptamalyq baǵyttaǵy, eksklıýzıvti materıal jazǵan gazet tilshilerge táýelsiz komıssııa sheshimimen aı saıyn aqshalaı júlde berilip keledi. Gazetter dızaıny da sarapqa túsip jatady. Basylymdar betterinde qoǵamdaǵy ózekti máseleler qalys qalyp jatqan joq. Seriktestik bıyldan bastap «Mıllıoner jýrnalıst» atty jobany júzege asyrmaqshy. Jyl boıy barlyq talapqa saı kelip, ónimdi qyzmetimen kózge túsken seriktestik tilshisine kásibı mereke qarsańynda 1 mıllıon teńge tabystalady.
Salanyń ózekti máselelerin talqylap, qoǵamnyń qozǵaýshy kúshi retindegi BAQ rólin aıqyndaýǵa arnalǵan jıynda fılologııa, jýrnalıstıka jáne tarıh kafedrasynyń aǵa oqytýshysy, fılologııa ǵylymdarynyń kandıdaty Nurlan Nurmahanov oqý ornynda bolashaq jýrnalısterdi daıyndaý isine toqtaldy. Oqytýshylyqtan bólek «Álimsaq» jýrnaly men «Ustaz mártebesi» gazetine jetekshilik etetin áriptesimiz 2012 jyldan beri «Bolashaq» ýnıversıtetinen jýrnalıstıka mamandyǵyn 200-den astam jas bitirip shyqqanyn atap ótti. Olardyń aldy qazir elimizdiń bedeldi aqparat quraldarynda qyzmet etedi.
Jıynda «Bolashaq» ýnıversıtetiniń oqytýshysy, ardager-jýrnalıst Aıtkúl Shalǵynbaeva jýrnalıstıka menedjmenti, memlekettik tapsyrys, BAQ pen bılik qarym-qatynasy jaıynda oı órbitti.
– Memlekettik tapsyrys eki jaqqa da tıimdi bolýy kerek. Bul jerde BAQ erkindigi, oqyrman quqy da eskerilýi kerek, – dedi ol.
Ortaq taqyryp aıasynda Qazaqstan Jýrnalıster odaǵy oblystyq fılıalynyń jetekshisi, oblystyq «Syr boıy» gazetiniń bas redaktory Qýat Sharabıdınov te pikir-paıymyn jetkizdi.
– Kezinde memlekettik tapsyrys ulttyq baspasózdi daǵdarystan aman alyp qalǵanymen, áli kúnge qazaq jýrnalısteriniń muń-muqtajy tolyq sheshile qoımady. Degenmen úmit úzilgen joq. Qoǵamdaǵy ózgerister aqparattyq salaǵa sony lep ákeledi dep senemiz. Ásirese jazylym, jarnama jáne memlekettik tapsyrys aıasynda jumys istep kele jatqan dástúrli BAQ-qa jańasha qoldaý asa qajet, – dedi ol.
Basqosý sońynda jýrnalıstıka kafedrasynyń stýdentteri túrli saýal qoıyp, mamandarmen pikir almasty. Dóńgelek ústelge qatysqan qonaqtar oqý ǵımaratyn aralap, mundaǵy jańalyqtarmen, bilim berýdiń ádistemelerimen tanysty.
Qyzylorda
