Ony alǵash ret aq jeleń kıgen qyz-jigittermen birge ásker qataryna jańadan alynyp, shekara basqarmasynyń tabaldyryǵynan endi attaǵan jas sarbazdardy medısınalyq tekserýden ótkizip jatqan sátinde kórdik. Jumysyna janymen berilgen bilikti mamanǵa áskerı salaǵa qalam terbeıtin tilshilerdiń de, óz áriptesteriniń de qurmeti erek.
UQK Shekara qyzmeti Almaty oblystyq departamentine qarasty Qarasaı aýdany boıynsha shekara basqarmasynyń medısınalyq qamtamasyz etý bólimshesiniń basshysy, maıor Maqsat Tileýǵabylovany aınalasy óz isiniń bilgiri retinde biledi. Qyzylorda oblysynyń Aral qalasynda dúnıege kelgen keıipkerimizdiń ómiri áskerı salamen órilgen. О́mirlik serigi Erbol da – shekarashy ofıser.
Semeı qalasyndaǵy memlekettik medısına akademııasy tabystyrǵan erli-zaıyptylar armanǵa birge qanat qaǵyp, ózderi bilim alǵan oqý ordasynda oqytýshy bolyp eńbek jolyn bastaǵan. Bul – elimizde memlekettik tilge erekshe nazar aýdarylyp, oqý oryndarynda qazaq bólimderi kóptep ashylyp jatqan 2000 jyldardyń basy bolsa kerek. Sondyqtan Shekara qyzmetiniń sapyna shaqyrylǵanǵa deıin azamattyq bilim oshaqtarynda óziniń mamandyǵyna saı jumys istegen Maqsat Serikbaıqyzynyń ǵylymı-pedagogıka ótili 14 jyldy quraıdy. Eki oqý quralynyń, 10 ǵylymı eńbektiń teń avtory.
Ol anasyna qarap boı túzepti. Anasy Kúlásh Maıdanbaıqyzy Aral qalasynda uzaq jyldar boıy medbıke bolyp jumys istegen. Bul týraly Maqsattyń ózi bizge bergen suhbatynda bylaı dep aǵynan jarylǵan: «Men sabaqtan keıin kóbine anamnyń jumys ornyna baratynmyn. Sonda anam sekildi medbıkeler men dárigerlerdiń aldaryna kelgen adamdardy qalaı emdegenderi, olardyń naýqastarǵa kórsetken erekshe yqylasy men qamqorlyǵy jadymda jańǵyra berdi. Osydan keıin men de áskerı dáriger bolýdy uıǵardym».
2008 jyly joldasy Erbol Tileýǵabylov shekarashylar qataryna qabyldanyp, qazaq-qytaı shekarasynyń boıynda ornalasqan Jarkent shekara jasaǵyna jiberiledi. Osylaısha, Maqsat úshin garnızonnan-garnızonǵa kóshý bastalady. Jańa ortaǵa kele salyp, óziniń mamandyǵyna saı osyndaǵy «Dıana» medısınalyq kolledjine jumysqa qabyldanyp, stýdentterge sabaq berýge kirisedi. Bul qyzmeti shekarashy joldasynyń laýazymy ósip, Shonjy shekara jasaǵyna medısına qyzmetiniń basshysy bolyp taǵaıyndalǵanǵa deıin jalǵasady. Maqsat munda da jumyssyz otyrmaıdy. Shonjy medısınalyq kolledjine oqytýshy bolyp kiredi. Al bir jyldan keıin ózi de ıyǵyna qos juldyz taǵyp, Almaty irgesindegi Qarasaı shekara jasaǵyna qyzmetke alynady. Osydan keıin áskerı tártipke saı joldasy da osyndaǵy áskerı bólimderdiń birine aýystyrylady.
Qazir bul áskerı ujym Qarasaı aýdany boıynsha shekara basqarmasy dep atalady. Mamandyǵyna adal Maqsat Serikbaıqyzynyń laýazymyna qosa, ıyǵyndaǵy kishkentaı juldyzdary úlkeıip, maıor dárejesine jetken. О́zi 2021 jyldan beri medısınalyq qamtamasyz etý bólimshesin basqarady.
Bizdiń keıipkerimizdiń ustanymy – kásibı sheberlik hám sarbaz saýlyǵyna sapaly qyzmet jasaý. Búginge deıin talaı shekarashy Maqsat hanymnyń em-domyn alyp, denesin dendegen dertine qosh aıtqan. Osyndaı erlikke para-par eńbegi úshin ol – «Medısına salasynyń úzdigi» atanýǵa ábden laıyq jan. Budan ózge, quralaıdy kózge atqan mergendigi bar. Ańǵa shyqpaıdy, árıne. Departamenttiń qala irgesindegi polıgonyna baryp, nysana kózdeýden synaq tapsyrǵan kezde arýlar ishinen ofıserge teń keletin jan tabylmaǵan.
Kópbalaly ana. Qyzdary – Janerke, Arýjan, uldary – Beıbarys, Beksultan. Shekarashy ofıserlerdiń tula boıy tuńǵyshtary joǵary bilimdi, óz mamandyǵymen jumys isteıdi. Arýjan – Abaı atyndaǵy Qazaq ulttyq pedagogıkalyq ýnıversıtetiniń stýdenti. Beıbarys 8-synypta oqıdy. Al úıdegi eń kishileri Beksultan 5 jasta.
Áý basta ózi bilim alǵan oqý ordasynda oqytýshy bolyp eńbekke aralasqan Maqsattyń shákirtterin búginde elimizdiń túkpir-túkpirinen kezdestirýge bolady. Olardyń deni shekara qyzmetinde. Maıor hanymnan dáris alǵan Álimhan Kárimbaev degen sarbaz búginde Reseıdiń Sankt-Peterbýrg qalasyndaǵy birneshe ǵasyrlyq tarıhy bar áskerı-medısınalyq akademııanyń ekinshi kýrsynda oqıdy.
Biz maıor Maqsat Tileýǵabylovany «Medısına salasynyń úzdigi» atanýǵa ábden laıyq dep beker aıtyp otyrǵan joqpyz. Kóktem men kúz aılarynda jastardy áskerge shaqyrý naýqany bastalǵan boıda Maqsat bastaǵan áskerı medısına qyzmetkerleriniń tolassyz jumysy qyza túsedi. Buǵan el shebindegi shekara bólimshelerin qosyńyz. Álbette, shekara shebin kirpik qaqpaı kúzetetin áskerı qyzmetshiler temirden jaralmaǵan. Olar da aıaq asty aýyryp qalýy múmkin. Osyndaıda, birinshi bolyp sheshim qabyldaıtyn Maqsat Serikbaıqyzy. Sarbaz shekara basqarmasynyń medısınalyq lazaretine jetkizilip, tıisti em-domyn qabyldaýǵa kiriskenge deıin damyl tappaıdy. Jaǵdaıdy óziniń baqylaýynda ustap otyrady. «Bosańsý – bizge jat» deıtini sondyqtan.
ALMATY
