Ustazdardyń arasynda tek óz jumysyn súıetin, odan lázzat alatyn, oqýshylary men stýdentterin jaqsy kórgennen jastardyń jalynynan qýat alatyndary ǵana kúsh-qýatyn joǵaltpaıdy. Uly Abaı: «Ustazdyq etken jalyqpas – úıretýden balaǵa» degende naq osyndaı ustazdardy aıtqan. Janar Serkeshqyzy, mine, osy qaǵıdaǵa dóp kelgen ustaz. Ol óziniń kórkem minezinen eshqashan ózgermeı, qajymaı talmaı, stýdentterimen barynsha jyly qarym-qatynas jasap keledi. Onyń aldynan shyqqan jastardyń alǵystan basqa aıtary joq.
Qazir ol M.Qozybaev atyndaǵy Soltústik Qazaqstan ýnıversıtetiniń «Qazaq tili jáne ádebıeti» kafedrasynyń professory, ýnıversıtet rektorynyń keńesshisi, fılologııa ǵylymdarynyń kandıdaty. Kandıdattyq dıssertasııasyn Ál-Farabı atyndaǵy Qazaq ulttyq ýnıversıtetiniń aspırantýrasyn aıaqtaǵannan keıin akademık Myrzataı Serǵalıevtiń basshylyǵymen «Ǵalym Maldybaev poezııasynyń kórkemdik quraldary» atty taqyrypta qorǵaǵan. Odan beri kafedra meńgerýshisi, Til jáne ádebıet ınstıtýtynyń dırektory, odan «Rýhanı jańǵyrý» óńirlik jobalyq keńsesiniń basshysy, prorektor sekildi qyzmet satysynan ótip, 2022 jyldan qazirgi qyzmetin atqaryp keledi. Basshylyq, ustazdyq qyzmetten qol úzbeı júrip, 6 monografııasyn jarııalaǵan. Budan basqa ol 20 oqý jáne oqý-ádistemelik quraldardyń jaryq kórýine atsalysqan, AQSh, Germanııa, Chehııa, Bolgarııa, Moldova, Belarýs, Reseı, Ýkraına, Japonııa elderinde bolǵan ǵylymı-praktıkalyq konferensııa materıaldarynda baıandamalary jarııalanǵan, jalpy sany 200-den astam ǵylymı, 100-ge jýyq qoǵamdyq-saıası, memlekettik til máselelerine qatysty maqalalary shyqqan. Osynyń bári onyń bilikti ustaz, jańashyl pedagog ekeniniń aıǵaǵy.
Onyń jetekshiligimen 40-qa jýyq magıstrlik dıssertasııa qorǵaldy. Kásibı sheberligin shyńdaý maqsatynda biliktilikti arttyrý kýrstarynan ótip, birneshe sertıfıkat alǵan. Ol Ulybrıtanııa, Polsha, Reseı, Túrkııa, Qyrǵyz elderinde ǵylymı taǵylymdamadan ótip, «Joǵary oqý oryndarynyń úzdik oqytýshysy – 2016» memlekettik grantynyń ıegeri boldy. Qoǵamdyq jumystarmen de belsene aınalysady.
J.Talaspaeva – úlken shańyraqtyń otanasy, balalarynyń aıaýly anasy bola bilgen jan. Kásipker bolyp isteıtin jubaıy Qýandyq ekeýi Tólegen, Dilnáz esimdi ul-qyz ósirip, qazir Astanada dáriger bolyp isteıtin ulynan Aısha degen nemere súıip otyr. Dilnázi – ýnıversıtettiń 2-kýrs stýdenti.
«Qazirgi jastardyń boıynan qandaı minezderdi kóresiz?» degenimizde, ol: «Qazirgi jastar arasynda dostyqty, týysqandyq qatynasty qajet etpeıtin, ózimshil jastar kóbeıgen», degen ókinishin aıtty. «Alaıda qazir táýelsiz elimizdiń ıgiligin kórgen, jańasha oılaıtyn, 2-3 tildi erkin biletin urpaq ósip keledi. Olardyń joǵary bilikti maman bolýǵa múmkindigi de, áleýeti de joǵary», dedi ol senimmen.
Petropavl
