Ana qýanyshy, áıel baqyty – otbasynyń, qoǵamnyń, Otannyń mereıi. Memleket basshysy Qasym-Jomart Toqaev atap ótkendeı: «Árbir adam úshin anadan uly, anadan qymbat eshkim joq. Eń qasterli qundylyqtarymyz «Jer-ana», «Otan-ana» uǵymdarymen tyǵyz baılanysty. «Ata uldy, ana ultty tárbıeleıdi» deıdi. Bul sózdiń aıryqsha mán-mańyzy bar. Ult bolashaǵy urpaq tárbıesinen bastalady. Ár balanyń jetistigi – ana mahabbatynyń jemisi. Uly Abaı aıtqan «Tolyq adamǵa» tán asyl qasıetter urpaqtyń boıyna ana arqyly darıdy».
Qoǵamnyń órkenıettiligi áıel-anaǵa degen kózqarasynan kórinedi, syı-qurmetinen bilinedi. Elimizde erteden áıel-anaǵa degen erekshe qurmet qalyptasqan. Eń asylymyz, eń qymbatymyz abzal anaǵa dep, ananyń ómirdegi ornyn barynsha baǵalaıtyn ata saltymyz bir de buljyǵan emes. Sonaý at aýyzdyǵymen sý ishken, er etigimen saz keshken qadym zamandardan keshegi táýelsizdiktiń taǵdyrly jyldaryna deıingi tarıhı shejirede qasıetti áıel-ananyń aıqyn qoltańbasy bar. Sondyqtan da halqymyzdyń búgingi kúnge aman jetip, táýelsiz memleket quryp, álemdik qoǵamdastyqtan óz ornyn oıyp alǵany úshin de biz eń aldymen kúresker uldardy dúnıege ákelgen qazaq áıelderiniń aldynda bas ııýge tıispiz.
Táýelsizdik tuǵyryna qonyp, egemendik alǵaly beri elimiz otbasynyń, ana men balanyń jaǵdaıyn jasaý baǵytynda qoldan keletin sharalardyń barlyǵyn júıeli uıymdastyryp keledi. Prezıdent janynda Áıelder isteri jáne otbasylyq-demografııalyq saıasat jónindegi ulttyq komıssııa turaqty jumys isteıdi. Eńbek jáne halyqty áleýmettik qorǵaý, Oqý-aǵartý, Ǵylym jáne joǵary bilim, Densaýlyq saqtaý mınıstrlikteri men osy saladaǵy mekemelerdiń aldynda turǵan aýqymdy is-sharalardyń oryndalýy da jyldan jylǵa jaqsaryp, oń arnaǵa túsip keledi. Qazirgi kezde oblystarda, qalalar men aýdandarda da áıelderge naqty baǵyttalǵan túrli áleýmettik qoldaý sharalary júzege asyrylyp jatyr.
Memleket basshysynyń syndarly saıasatynyń arqasynda qoǵamymyzda qalyptasyp otyrǵan rýhanı kelisim men ultaralyq tatýlyq, turaqtylyq pen birliktiń buljymaı júzege asýynda qazaq áıelderiniń de zor úlesi bar. Búginde qoǵamdyq-saıası ómirimizde áıelder ózderiniń qarym-qabileti men qamqorlyǵyn tanytpaıtyn bir de bir sala joq.
О́tken jyldar ishinde áıelderdiń azamattyq belsendiligi de eleýli dárejede ósti. Memleket jáne ókiletti organdardaǵy áıelder sany arta tústi. Parlamentte 28 áıel depýtat, Úkimette úsh áıel mınıstr bar. О́nerkásiptiń negizinen áıelder jumys isteıtin salalaryn jandandyrý jóninde birneshe memlekettik baǵdarlama júzege asyrylyp jatyr. Áıelderdiń densaýlyǵyna qamqorlyq kórsetý baǵytynda da birqatar is tyndyryldy. Keıingi kezeńderdegi qoǵamdaǵy túrli jaǵdaılarǵa baılanysty áıelderdiń, ana men balanyń quqyqtaryn qorǵaý úshin qajetti zańnamalar úzdiksiz jetildirilip, tolyqtyrylyp jatyr.
Teginde tek mereke kúnderinde emes, árqashan, barlyq ýaqytta da áıel-analardyń ál-aýqatyna, turmys-tirshiligine nazar aýdaryp otyrý qajet. Sonda ǵana ómirdi baqyt pen shattyqqa aınaldyrýǵa, ananyń qas-qabaǵyna qaraı otyryp, qoǵamnyń qıly máselelerin qapysyz sheshýge bolady. «Ana júregi – aldamaıtyn tarazy», «Anasyn renjitkenderdi Alla taǵala da jaqtamaıdy», «Ananyń alaqany – aıdyndy qonys» syndy maqal-mátelder de halqymyz úshin ananyń orny qanshalyqty qadirli ekenin ańǵartady. Sondyqtan áıel-analardyń jan álemi árqashan baqytqa, qýanysh-shattyqqa, mereıge tola berýi úshin qoldan kelgenniń bárin jasaý kerek.
Oshaqtyń otyn mazdatyp, shańyraqtyń shyraıyn kirgizip, bereke men birliktiń uıytqysy bolyp otyrǵan, Otanymyzdyń keleshegi – jas urpaq tárbıeleýge júreginiń kúshin, boıyndaǵy qaırat-jigerin sarqa jumsap kele jatqan abzal analarǵa qurmet kórsetý – qoǵam úshin, árbir sanaly adam úshin bıik mártebe, zor ǵanıbet.
