Buǵan deıin qutqarýshylar kenish oıyǵyna qulaǵan avtobýsty izdeý jumystaryn aqpan aıynyń basynda toqtatyp, «Maıqaıyńaltyn» AQ shuńqyr túbine aýyr tehnıka ózdiginen júrip baratyndaı jol sala bastaǵan. Alaıda jýyqta Maıqaıyń kenishindegi jer qazý jumystary tolyqtaı doǵarylyp qalǵany jaıynda aqparat tarady. Qurdymǵa qulaǵan avtobýsty izdeý jumystary ne sebepti toqtatylǵany týraly «Maıqaıyńaltyn» AQ bas dırektory Qýanysh Botın bizge bylaı dep túsindirdi:
– Aqpan aıynyń basynda qutqarýshylar barlyq kerek-jaraǵyn jınap, izdeý jumystaryn toqtatqany málim. Biz jer astynda jatqan qos azamattyń týystarynyń ótinishin eskerip, jer qazý jumystaryn óz kúshimizben jalǵastyramyz dep sheshtik. Aýyr tehnıkanyń kómegimen búıirlik transheıalar keńeıtilip, oıyqtyń túbine deıingi appareli tereńdetile bastady. Bul jumysty úsh aptadan asa júrgizdik. Alaıda mundaı is-sharalardy júrgizý úshin áýeli jer qazý jumystarynyń jobasy ázirlenýi kerek edi. Ony bizben turaqty baılanys ornatqan bir fırma bastapqyda jasap beremiz degen. Olar máseleni zerdeleı kelgende, jaǵdaıdyń asa kúrdeli ekenin eskerip, jaýapkershilikten bas tartty. Fırma ókilderiniń aıtýynsha, jer qazý jumystary barysyndaǵy qaýipsizdikti qamtamasyz etý óte qıyn. Al jobany ázirleýshi kompanııa ol jaýapkershilikti arqalaǵysy kelmeıdi. Sáıkesinshe, biz jumysty odan ári jalǵastyra almadyq. Bolmaǵan soń syrttan mamandardy shaqyryp, oıyqty kórsettik. Olar osy betpen qaza berseńizder, oıyqtyń aınalasyndaǵy topyraqty bosatyp, jaǵdaıdy múlde ýshyqtyrasyńdar dep eskertti. Bosańsyǵan topyraq kez kelgen sátte jarylyp, jer astyna túsip ketýi múmkin. Buǵan deıin qutqarýshylar avtobýs qulaǵan jerde, ıaǵnı shuńqyr astynda tereń qurdymdar paıda bolǵanyn eskertken. Aýyr tehnıka shuńqyr túbine tússe onsyz da qopsyp turǵan ken jynystary onyń salmaǵyn kótere almaı, opyrylyp túsýi múmkin. Budan adam shyǵyny bolýy da yqtımal. Osy jaǵdaılardyń barlyǵyn eskere kelip, aqpan aıynyń sońǵy aptasynda biz bastapqy sheshimimizdi ózgerttik. Al izdestirý jumystary aldaǵy ýaqytta jalǵasa ma, joq pa, ony aıta almaımyn. Sebebi bul bizdiń quzyrymyzdaǵy másele emes, deıdi kásiporyn basshysy.
Buǵan qosa ol qazirgi kúni óndiris orny Qonaev atyndaǵy taý-ken isi ınstıtýtymen baılanys ornatyp otyrǵanyn málimdedi. «Oqý ornynda taý-ken isin jetik biletin myqty ǵalymdar bar. Olardyń kómegimen altyn kenishin tolyq tekserip jatyrmyz. Shahtamyzdaǵy ken óndirý isi 4 qańtardan beri tolyq toqtap turǵany málim. «Aldaǵy ýaqytta kenishtegi jumystardy qaıta jalǵastyrsaq, jer astyndaǵy shahtalar qanshalyqty qaýipsiz bolady, qyzmetkerlerimizdiń ómirine qaýip tónbeýi úshin ne isteı alamyz» degen suraqtarǵa ǵalymdarmen birge jaýap izdestirip kelemiz. Mamandar barlyq jaǵdaıdy eseptep, qosymsha zertteýler taǵaıyndady. Bul is-sharalardyń barlyǵy 30 naýryzǵa deıin aıaqtalýy kerek. Sodan soń baryp, kenishtiń keleshegi sheshiledi», dep tarqatty áńgimesin Q.Botın.
Al óńirlik tótenshe jaǵdaılar departamenti buǵan deıin kenishtegi jumystarǵa jumyldyrylǵan qyzmetkerler men tehnıkalar tolyqtaı óz qyzmet oryndaryna qaıtyp oralǵanyn habarlady. Qajet bolǵan jaǵdaıda departament mamandary Maıqaıyńǵa kómekke bara alady.
Búginde «Maıqaıyńaltyn» AQ-nyń shahtadan ózge qurylymdyq bólimshelerinde, sonyń ishinde ken baıytý kombınatynda jumys tolyq shtatta jalǵasyp keledi. Kásiporyn boıynsha shamamen 250-deı adam májbúrli eńbek demalysynda. Bas dırektor olardyń qyzmet áreketi shahtamen baılanysty bolǵandyqtan toqtap tur dep sendirdi. Qyzmetkerlerge jyldyq ortasha aılyq jalaqysynyń 50 paıyz kóleminde eńbekaqy tólenip jatyr.
Pavlodar oblysy
