«Prommashkomplekt» JShS-da aıyna 25 myń, bir jylda 300 myń temirjol dońǵalaǵy shyǵarylady. Bul – elimizde balamasy joq kásiporyn. Mundaı zaýyttyń búkil TMD-da tórteýi ǵana bar. 2012 jyly iske qosylǵan óndiris ornynda 930 adam eńbek etedi, ortasha eńbekaqy 430 myń teńgeni qurap otyr.
«Zaýyt shyǵaratyn tutas taptamaly jáne tisti dońǵalaqtar elimiz boıynsha bizde ǵana óndiriledi. Negizinen dońǵalaqtyń 9 túrin shyǵaramyz. Olar júk jáne jolaýshylar vagondaryna, aýyr tartqysh lokomotıvter men jyldamdyǵy joǵary lokomotıvterge, elektrovozdarǵa, metropolıten kólikterine arnalǵan. О́nimniń 25 paıyzy Qazaqstannyń ishine, ózgesi shetelderge satylady. Ishki suranysty 100 paıyz ótep turmyz. Kásiporynnyń qazirgi maqsaty – eýropalyq standarttaǵy dońǵalaqtardy óndirý. Alǵashqy partııadaǵy eýropalyq dońǵalaqtarymyz aýdıtten ótkizildi. Endi naqty naryqqa baǵyttaıtyn josparymyz bar. Mundaǵy qural-jabdyqtyń barlyǵy zamanǵa saı avtomattandyrylǵan, qolmen atqarylatyn jumys óte sırek. Kún saıyn shyǵarylǵan ónimderimizdi birden syrtqa tıep jiberip otyramyz. Sebebi suranys jetkilikti. Shamamen táýligine 700-800-deı dońǵalaq eksportqa jiberiledi. Belorýsııa elindegi temirjol kompanııasymen kelisimge otyryp, olardyń vagondary úshin de ónim óndirip jatyrmyz. Bizden shyǵarylǵan dońǵalaqtarda aqaý óte az kezdesedi. Sondyqtan shet memleketterde taýarymyzǵa degen senim joǵary», deıdi kásiporynnyń bas dırektory Ivan Dychko.
Seriktestik júzege asyryp otyrǵan aýqymdy joba Qazaqstannyń temirjol salasyn damytyp qana qoımaı, syrttan keletin taýardy otandyq ónimmen almastyrý máselesin oń sheship berip otyr. Zaýytta shyǵarylatyn temirjol dońǵalaqtarynyń baǵasy ımporttyq quraldardan arzan ári sapaly. Munda Chehııa, Germanııa, Shveısarııa, Reseı, Belarýs, Japonııa, Italııa memleketterinen ákelingen stanoktor men qondyrǵylar paıdalanylady.
Atap ótý kerek, «Prommashkomplekt» «Railcast systems» temirjol klasteriniń quramyna enedi. «Railcast systems» JShS-nyń ózi óndiristik aýmaqta taǵy bir zaýyttyń qurylysyn qolǵa alǵan. 2026 jyly paıdalanýǵa beriletin jobanyń jumys ataýy – «Ustalyq-bandaj keshenin qurý». Iаǵnı keleshekte múlde jańa, zamanǵa saı robottehnologııamen jaraqtalǵan zaýytta lokomotıv bandajdary shyǵaryla bastamaq. Lokomotıv bandajy – lokomotıvtiń dońǵalaq jubynyń aýystyrylatyn elementi.
Pavlodar oblysynyń kásipkerlik jáne ındýstrııalyq-ınnovasııalyq damý basqarmasy basshysynyń orynbasary Rýslan Tileýlesovtiń dereginshe, jobanyń jalpy quny – 78,6 mlrd teńge. Bolashaqta kásiporynda jylyna 160 000 buıym shyǵarylyp, onyń 92 paıyzy eksporttalady dep kózdelip otyr. О́ndiris orny iske qosylǵanda Ekibastuz qalasynda jańadan 570 jumys orny qurylady.
«О́nerkásipti damytý qory» AQ «Railcast Systems» seriktestiginiń jobasy boıynsha ótinimdi maquldaǵan. Qazir qurylys-montajdaý jumystarynyń 60 paıyzy, jalpy jobanyń 40 paıyzy júzege asyp úlgerdi. Kompanııa keleshek zaýytqa jetkiziletin qural-jabdyqtar qunynyń 50 paıyzyn búginde tólep qoıypty. Osyndaı jobalardyń nátıjesinde Ekibastuzdyń ekonomıkasy ártaraptanyp, qalanyń otyn-energetıkalyq keshenge táýeldiliginen arylýy josparlanyp otyr.
Pavlodar oblysy
