Bul qor tuqym túrlerin uzaq jyldar boıy saqtaý úshin salynǵan. Ásirese onda adam ómiri úshin mańyzy zor dándi daqyldar men dárilik ósimdikterge kóp oryn bólingen. Tuqymdy saqtaýǵa atalǵan araldyń tańdalýy da tegin emes. О́ıtkeni munda únemi shyńyltyr aıaz bolyp turady. Qoıma taýdyń astynda 120 metrde ornalasqan. Teńiz deńgeıimen eseptegende 130 metr tereńdikte jatyr. Tuqym qory tolyqtaı muzdatqyshpen jabdyqtalǵan. Túrli apattan saqtaıtyn esikter men kamera qoıylǵan.
Osy jobanyń ǵylymı jetekshisi Saqysh Erjanovanyń aıtýynsha, qorda saqtaý úshin elimizden 8 botanıkalyq túrge jatatyn jemshóp daqyldarynyń 522 úlgisi iriktelip alynǵan. Ásirese jońyshqa daqyldaryna erekshe nazar aýdaryldy.
«Bizdiń elimiz jer kólemi jaǵynan álemde 9-oryn alady. Sonyń 180 mıllıonnan astam gektary jaıylymdy quraıdy. Shóleıtti aımaqtar da basym. Jergilikti turǵyndar úshin jaıylym – mal ustaýdyń kózi. Biraq sony júıesiz paıdalansa, jaıylymdyq jer erozııaǵa ushyraıdy. Sonyń saldarynan jemshóp daqyldary men olardyń ekotıpteri deńgeıindegi genetıkalyq ártúrlilik tarylady. Alaıda jem shóp daqyldarynyń túrin ekotıptik deńgeıde saqtaý óte mańyzdy. Osyǵan baılanysty 2015 jyldan bastap, akademık Ǵ.Meıirmannyń jetekshiligimen jemshóp daqyldarynyń jabaıy túrin jınaý úshin ekspedısııa uıymdastyrylyp keledi. Jalpy, osy sapar bizdiń ınstıtýttyń álemdik ǵylymı qoǵamdastyqpen baılanysyn odan ári keńeıte tústi», dedi S.Erjanova.
