Oblys ortalyǵynan jyraqta jatqan aýdandaǵy kámpıt sehin 2012 jyldan bastap Nurbek Qazbergenov atty azamat qolǵa alyp, is aıasyn keńeıtip otyr. Qazir munda «Qazaly» kámpıtiniń 7 túri shyǵarylady. Alys aýdandaǵy seh oblysta tátti túrlerin shyǵaratyn avtomattandyrylǵan jalǵyz kásiporyn ekendigin de aıta keteıik. Daıyn ónimder Qyzylordadan bólek, Aqtóbe, Batys Qazaqstan, Mańǵystaý, Atyraý oblystaryna jol tartady.
Táttiniń tarıhyna úńilsek, ótken ǵasyrdyń elýinshi jyldaryna ketip qalamyz. О́ndiris oryndaryn turalatyp ketken toqsanynshy jyldary osy kásiporynnyń aınalasyndaǵylar kámpıtti úıden jasap, onysyn poıyzda saýda jasaıtyndar kóterme baǵamen satyp alyp júrdi.
Nurbek Qazbergenov otbasylyq kásip retinde sehti júrgize bastaǵanda da barlyq jumys baıaǵydaı qolmen atqarylatyn.
Qazanda qaınaǵan shárbát aldymen ılenedi. Ol sýyǵannan keıin birneshe adam qaıshylap kesip, oraýǵa kirisedi. Ýaqyt pen adam kúshi kóp jumsalatynynan bólek táttiniń osy túrinde syrty jyltyrap, jutynyp turǵan kámpıttiń ózge sorttarymen básekege túse almaıtyny da anyq edi. Sondyqtan jas kásipker áýeli osy qıyn sharýany jeńildetýdi oılady.
«Aldymen Qyrǵyzstan men Qytaıdaǵy kondıterlik sehtar jumysymen tanystym. «Jumyspen qamtý – 2020» baǵdarlamasy aıasynda 18 mln teńge nesıe alyp, óndiristi ishinara avtomattandyrylǵan júıege kóshirdik. Osylaısha, 30 adamnyń tirligin 4 jumysshy atqaratyn boldy. Qytaı men Reseıden kámpıtterdi sozyp, bólip, týraıtyn jáne qaǵazyn oraıtyn apparattar satyp aldyq», deıdi kásipker.
Osyndaı jumystar arqasynda 2015 jyly «Qazaqstannyń úzdik taýary» kórme-baıqaýynda «Qazaly» kámpıti jeńimpaz atandy. Ár jylǵa qoıylǵan jospardy oryndaý arqyly ónim qazirgi kúni elimizdegi qatty karamel óndirisinen óz ornyn oıyp turyp aldy. 2021 jyldan bastap «Qazaly» kámpıti jańa úlgidegi qaptamamen shyǵyp keledi.
Bul ónimdi úıden daıyndaıtyndar áli de bar. Qazalyda 15 shaqty úı, Qyzylorda men Aralda, Qarmaqshyda ázirleıtinder de kezdesedi. Al sehtaǵy ónim halyqarlyq standarttarǵa saı kelýimen erekshelenedi. Kámpıt daıyndaýǵa kerekti qant baǵasy da, ónimdi oraıtyn qaptama men hosh ıistendirgishterdiń baǵasy jyl saıyn ósip keledi. Ári onyń barlyǵy syrttan ákelinedi. Bul eń aldymen árıne, ónimniń ózindik qunyna áser etedi.
«Astanada ótken «Qazaqstannyń úzdik taýary» kórme-baıqaýy ónimimizdi el kóleminde tanystyrýdyń múmkindigi boldy. Byltyr oblysqa jasaǵan saparynda Memleket basshysy da «Qazaly» kámpıtimen tanysyp, oń baǵasyn berdi. Osynyń bári bastaǵan isimizdi jalǵastyrýǵa úlken demeý. Búginde tutynýshylar talabynyń da kóp ózgergenin baıqaımyz. Olardyń suranysyna saı bolý úshin izdenisti toqtatpaımyz», deıdi kásipker.
Aýdannan osy ýaqytqa deıin kúrish, balyq ónimderi jáne qamys shetelge eksporttalyp kelse, endi olardyń qataryna «Qazaly» kámpıti de qosyldy. О́ńir brendine aınalǵan ónim kóp uzamaı Qytaı elindegi saýda sórelerine túse bastaıdy.
Qyzylorda oblysy,
Qazaly aýdany
