Foto: akorda.kz
Zamanaýı ınnovasııalyq ortalyq Qasym-Jomart Toqaevtyń bastamasymen qazaqstandyqtardyń atynan baýyrlas ázerbaıjan halqyna gýmanıtarlyq tartý retinde qysqa merzim ishinde salyndy.
Ortalyqtyń ashylý saltanaty barysynda Ázerbaıjan Prezıdenti Qasym-Jomart Toqaevqa jáne barsha qazaq halqyna alǵys aıtyp, ystyq lebizin joldady.
«Ortalyq qazaq halqynyń uly perzenti Qurmanǵazynyń esimimen ataldy. Bul tek balalardyń shyǵarmashylyǵyn shyńdap qana qoımaı, Qazaqstan men Ázerbaıjannyń dostyǵy men baýyrlastyǵyn aıshyqtaıtyn ortalyq bolady. Biz bul tartýǵa shyn júrekten rızashylyǵymyzdy bildiremiz. Ázerbaıjan halqy muny eshqashan umytpaıdy», dedi Ilham Álıev.
Ǵımarattyń irgetasy byltyr naýryz aıynda qalanǵan bolatyn. Nysandy jobalaý jumystary úsh aıdyń ishinde jasalyp, qurylysy 9 aıda aıaqtaldy.
1,5 gektar aýmaqta ornalasqan ortalyqtyń jalpy aýdany – 2700 sharshy metr. Eki qabatty ǵımaratta 600 balanyń birneshe aýysymmen mektepten tys bilim alýyna barlyq qajetti jaǵdaı jasalǵan. Munda dáris zaly, shahmat, aspaz klastary, kórkemóner jáne músin stýdııasy, horeografııa jáne sport zaldary, dybys jazý kabıneti, mýzyka jáne vokal klasy, foto-beınemontaj, veb-dızaın jáne robotty tehnıka kabınetteri, akt zaly, 3D-modeldeý klasy bar. Ortalyqta IT-ctartaptarǵa jáne Ázerbaıjannyń ulttyq mádenıetine, sonyń ishinde kilem toqý ónerine aıryqsha mán berilgen.
Memleket basshysy Qasym-Jomart Toqaev Ortalyq ujymyna Qurmanǵazy dombyrasynyń kóshirmesin, sondaı-aq bilim oshaǵynyń tárbıelenýshilerin tasıtyn avtobýsty syıǵa tartty.
