О́ńirde tuńǵysh ret ashylǵan aqparattyq keshen beıne jáne aýdıo jazýǵa, aqparattyq beıneprezentasııalar daıyndaýǵa, onlaın dárister men veb-konferensııalar ótkizýge arnalǵan.
Atalǵan joǵary oqý ornynyń rektory Erjan Ámirbekuly mýltımedııalyq beınestýdııanyń oqý barysynda qoldanýǵa erekshe qajet ekenin jetkizdi.
«Álemdik bilim berý úrdisi jańa strategııalyq maqsattardy kózdeıdi. Sáıkesinshe, sol tolqynǵa ýaqytynda ilesip, qajetti múmkindikter alańyn usyný asa mańyzdy. Osy oraıda kópfýnksııaly mýltımedııalyq beınestýdııa bizdiń qala men ınstıtýt oqytýshylary, stýdentter úshin sapaly medıakontent qurýǵa túrtki bolatynyna senimim mol», dedi ol.
Interaktıvti beınestýdııa qashyqtan oqytý jáne shyǵarmashylyq qyzmetti uıymdastyrýdyń eń zamanaýı jáne tıimdi sheshiminiń biri. Onyń biregeı múmkindigin paıdalana otyryp, ınteraktıvti beınenusqaýlyqtar men beınedáristerdi jazýǵa, beınesabaqtar men konferensııalar ótkizýge jáne taǵy basqa da jańashyl ádistemeni is júzinde júzege asyrýǵa bolady.
Bir jaǵynan, bul Ǵylym jáne joǵary bilim mınıstrliginiń oqý úderisin sıfrlandyrý jónindegi talaptaryna sáıkes keletin sıfrlyq tehnologııalar arqyly oqytýshylar men stýdentterdiń ózara is-qımylynyń qundy quraly ispetti.
Sondaı-aq sıfrlyq zerthana formaty ınteraktıvtilik pen pánderdi 3D modeldeý arqyly qashyqtan sabaq ótkizýge qolaıly. Eń negizgisi, beınestýdııa «Coursera» jáne «EDx» sııaqty halyqaralyq platformalarǵa arnalǵan kontent jasaýǵa, «zoom», «GoogleMeet», «WebEx» jáne basqa quraldar arqyly zamanaýı Led-taqtaǵa onlaın oqytýdy taratýǵa jáne aralas oqytý túrine arnalǵan oqý mazmunyn ázirleýge múmkindik beredi.
