Sýret ashyq derekkózden alyndy
Mysaly, ótken jyly Almatyda múgedektigi bar 433 adam ınnovasııalyq tehnıkalyq ońaltý quraldarymen qamtamasyz etilgen. Iаǵnı 2023 jylǵy memlekettik satyp alý arqyly 150 protez, 200 arba, 76 sóıleý prosessory men ınnovasııalyq 7 estý apparaty alyndy.
Osyndaı ınnovasııalyq protezdiń bireýine qoly jetken paralımpıadashy Djanet Jakıenniń endigi jerde qalany ońaı aralap, paýerlıftıngpen aınalysýdy jalǵastyryp jatqany qýantady.
«Men 1976 jyldan bastap protezben júre bastaǵanda jasandy aıaqtar aýyr ári yńǵaısyz bolatyn. Ýaqyt óte kele olar jeńil bolyp shyǵaryla bastady da, bul ómirdi edáýir jeńildetip, ıkemdi boldy. Alaıda, ókinishke qaraı, mundaı protezder sporttyq júktemelerge shydas bere almaıtyn. Qazirgi zamanaýı protezder – júrýge de, jattyǵýǵa da yńǵaıly. Arnaıy bekitetin qulyptary men sılıkon qaqpaqtary bar», deıdi paralımpıadashy.
Osy maqsatta bıyl Almatyda jergilikti bıýdjetten 1 mlrd 396 mln 550 myń teńge somasynda múgedektigi bar 288 adamdy ınnovasııalyq tehnıkalyq quraldarymen qamtamasyz etý úshin qarajat bólinip otyr.
Sapa basty orynda bolǵandyqtan, megapolıs basshysy Erbolat Dosaev qala turǵyndarymen kezdesken kezde ońaltý quraldaryn jetkizýshilerdi tańdaýda memlekettik satyp alý týraly zańǵa engen ózgeristerge qatysty túsinikteme berdi. Sebebi Naýryzbaı aýdany turǵyndarynyń biri qala ákimimen kezdesý barysynda Jol kartasy baǵdarlamasy arqyly byltyr kópfýnksıonaldy arba alǵanyn, sol arqyly balasynyń talaı ájeti ótelip, basyn, denesin, aıaǵyn ustap tura alatynyn, emdik áseri de bar ekenin alǵys sezimmen jetkizdi. «Bul balamnyń ońalýyna asa qajetti, sapaly gadjet eken. Jetkizýshilerdi tańdaǵan kezde taýarlar men qyzmetterdiń osyndaı sapasyna mán berýdi suraǵym keledi», degen edi ol.
Qala turǵynynyń shynaıy alǵysyna rızashylyǵyn bildirgen Almaty ákimi: «Balalarymyzǵa ońaltý quraldaryn satyp alý tásilderin qaıta qarastyrdyq. Ata-analarǵa yńǵaıly ári shıpasy bar zamanaýı arbalardy satyp alýdy qadaǵalap otyrmyz. Oǵan qosa protezderdi aýystyrdyq, estý qabileti nashar balalardy ońaltý máselelerin qaıta qarastyrdyq», dedi.
E.Dosaev byltyr osy maqsatqa 1,3 mlrd teńge bólinip, ońaltý quraldarymen 433 adam qamtylǵanyn, bıyl shamamen osynshama soma bólingenin jetkizdi.
Almaty qalasynyń ákimi jetkizýshilerdi tańdaýda sapa ólshemi boıynsha Eńbek jáne áleýmettik qorǵaý mınıstrligine usynystar túsirgenin alǵa tarta kele: «Qazir memlekettik satyp alý aıasynda bizge baǵa jaǵynan sanasýǵa týra keledi, biraq mınıstrlik bizdi qoldaıdy dep úmittenemin jáne balalarymyz ben múmkindigi shekteýli eresekter úshin eń jaqsysyn satyp alýǵa tyrysamyz», dedi.
ALMATY
