Buryn osy marafon 1 myń shaqyrymnan artyq qashyqtyqty eńsergen. Bıylǵy marafon soltústiktegi Kókshetaý óńiri men Aqmola tóńiregindegi tarıhı jerlerdi basyp ótedi. Sonyń ishinde Abylaıdyń, Kenesarynyń soltústikten ońtústikke júrgen joldaryn, ózen-kólder men jazyq dalany keshedi. Býrabaı kýrortynyń kórikti aımaqtaryn aralap, adamnyń alǵash ret jylqyny qolǵa úıretken mekeni – Botaıǵa soǵady, Astana túbindegi ejelgi qala Bozoqty basyp ótedi. Sóıtip, keń dalamyzdyń tereń tarıhyn búgingi urpaqqa tanystyra túspek.
Jarysqa elimizdiń barlyq 17 oblysy men 3 respýblıkalyq dárejedegi qalalarynan tórt adamdyq komanda qatysady. Marafon Petropavl ortalyǵyndaǵy «Abylaıdyń aq úıi» – hannyń rezıdensııasynan 12 mamyrda bastaý alyp, bes kúnde Astana qalasyna jetedi dep josparlanǵan.
Bıylǵy marafonnyń ereksheligi, V Dúnıejúzilik kóshpeliler oıyndary qarsańynda ótýinde. Jeńimpazdar qataryna engen úsh komanda qyrkúıek aıyna josparlanǵan «Uly dala joryǵy» halyqaralyq týryna beriletin lısenzııany alady.
Bir qyzyǵy bul joryqqa aýysyp minetin erýli attar birge júredi. Sonymen qatar attardyń jasy alty jastan, ıaǵnı besti attan kem bolmaýy kerek. Uıymdastyrýshylardyń aıtýyna qaraǵanda, bul – attardyń shekten tys qajymaýy, zoryqpaýy úshin qoldanylatyn talap. Sondaı-aq bul shara qazaqtyń qandaı jylqy tuqymy tózimdi ári myqty ekenin anyqtaıtyn dalalyq zerthana ispettes. Osyndaı birneshe maqsatty oryndaýdy aldyna qoıǵan marafon mamyr aıynda sóreden ótedi.
