«Búgin – elimizde otbasylyq qundylyqtar dáripteletin kún. О́negeli, ulaǵatty otbasylarǵa qurmet kórsetý maqsatynda óńirimizde kóptegen is-shara ótip jatyr. Bizdiń ujymymyzdaǵy qyzmetkerlerdiń otbasyndaǵy eń kishkentaı sábı áriptesimiz Alpysbaı Honjdyń bóbegi bolyp shyqty. Minekeı, kitaphana ujymy jınalyp, Aısha esimdi sábıge syılyq jasaýǵa keldik», dep atap ótti S.Toraıǵyrov atyndaǵy oblystyq kitaphananyń kreatıvti shyǵarmashylyq ortalyǵynyń basshysy Maral Tajenova.
Kishkentaı Aıshaǵa qazaqtyń ulttyq aspaby – úkili dombyrany dástúrli ánshi, respýblıkalyq baıqaýlardyń júldegeri Ásel Botaeva tabystady. Ertede jasy úlken, aýzy dýaly adamdar men óneri elden asqan jandar sábılerge bata berip, balalardyń ǵumyr jasy uzaq bolýyn tilegen. Balaǵa yrymdap syılyq syılaý, til-kózden saqtasyn dep úki, tumar taǵý buljymas dástúrlerdiń biri bolǵan. Áz Naýryz qarsańynda halqymyzdyń osyndaı ıgi dástúrleri qaıta oralyp jatqany qýantady.
Kitaphana salasynyń ardageri, aq jaýlyqty áje Hadısha Dándibaeva is-sharaǵa jınalǵandarǵa shashý shashyp, sábıge batasyn berdi. «Shańyraq kúni elimizdiń ár azamatyna jaqsylyq, otbasynyń amandyǵyn tileımiz. Ár shańyraqtyń bosaǵasynyń beriktigin, urpaqtarynyń keregesi keńeıe bergenin, bereke-yntymaǵy artyp, yrys-dáýletiniń taýsylmaýyn tileımiz. Qutymyz shaıqalmasyn, qazanymyz ottan túspesin!» dep tiledi ájeı.
Alty aılyq Aıshanyń ákesi Alpysbaı Honj – S.Baıazıtov atyndaǵy balalar oqý ortalyǵynyń basshysy, aqyn, satırık. Al anasy Gúlmereı mektepte sabaq beredi. Jas ári ónegeli otbasyndaǵy balalardyń úlkeni – ul. «Naýryz-bazarlyqqa» kenelgen shańyraq ıeleri kitaphanashylar ujymyna rızashylyqtaryn jetkizdi.
S.Toraıǵyrov atyndaǵy kitaphana Naýryz meıramyna arnalǵan ár aıshyqty kúnge erekshe sharalardy arnap jatyr. Umytylǵan dástúrler festıvali, Amal merekesin atap ótse, «Aına» galereıasynda ulttyq naqyshtaǵy keskindemeler men qoldanbaly ónerdiń týyndylary qoıyldy. Kıiz úı qurý boıynsha el úlkenderiniń sheberlik saǵaty boldy. Aldaǵy ýaqytta Naýryz meıramyna oraı munda ulttyq oıyndar – asyq atý men toǵyzqumalaqtan saıystar, «Úkili qyz» baıqaýy uıymdastyrylady dep kútilip otyr.
PAVLODAR
