Oral qalasynda Batys Qazaqstan oblysynyń ákimi Narıman Tóreǵalıev Memleket basshysynyń atynan ár salada qyzmet etip júrgen azamattar, eńbek adamdary, zııaly qaýym ókilderi men qoǵam belsendilerine aýyzashar berdi.
Osy kúni oblystyń ár aýdanynda mektepterge «Qazaqstan halqyna» qoǵamdyq qorynyń bıyl úzdik ári belsendi oqýshylarǵa taǵaıyndaǵan sertıfıkaty tapsyryldy. Elimiz boıynsha josparlanǵan 20 myń joldamanyń 829-y batysqazaqstandyq 5-8-synyp oqýshylaryna buıyrmaq.
Qaratóbe aýdandyq jastarmen jumys jónindegi resýrstyq ortalyǵy qaıyrymdylyq kúni aıasynda jalǵyzbasty analardy merekemen quttyqtap, úı-jaılarynyń mańaıyn qalyń qardan tazartyp, úıin jınastyryp berdi. «Kúmis alqa» ıegeri Táttigúl Baınııazova balalarǵa «Naýryz qorjyn» taratty. Al Syrym aýdanynyń ákimi Jumageldi Batyrnııazov aýdan ortalyǵyndaǵy birqatar ardagerge arnaıy baryp kórisip, merekelik syılyq tabys etti. Báıterek aýdanyndaǵy arnaýly áleýmettik qyzmet kórsetý ortalyǵy qarttar úıine «Júrekten júrekke» merekelik konserti uıymdastyryp, dámge toly sebet syılady. Osyndaı qaıyrymdylyq sharalary barlyq aýdanda ótti.
Al oblystyq tarıhı-ólketaný mýzeıi men oblystyq halyq shyǵarmashylyǵy ortalyǵy Mádenıet jáne ulttyq salt-dástúr kúnine oraı «Salt dástúrim – qazynam» atty is-shara men «Besikke salý» rásimin ótkizdi.
Mádenı jıynǵa mýzeı ardageri, Qazaqstan Respýblıkasyna eńbegi sińgen qaıratkeri Sara Tanabaeva, tarıhshy ǵalym Álfııa Baıbolsynova, «Arý analar» vokaldyq toby, stýdentter, mádenıet jáne mýzeı qyzmetkerleri qatysty.
Al Oral qalalyq kórme zalynda ótken «Urshyq patı» is-sharasyna Qazaqstan Qolónershiler odaǵynyń múshesi, qolóner «Urshyk» respýblıkalyq qoǵamdyq birlestiginiń jetekshisi Bıbigúl Kárdenova Astanadan arnaıy kelip, oraldyqtarmen tájirıbe bólisti. Basqosýda urshyq úıirýdiń qyr-syrymen qatar, oraldyq qolóner sheberleri de kıiz basýdan sheberlik saǵatyn uıymdastyrdy.
Bıyl Memleket basshysynyń bastamasymen on kúnge sozylatyn Naýryznama dekadasyn halyq erekshe yqylaspen qabyl alyp, ár is-sharaǵa belsene qatysyp júr.
Batys Qazaqstan oblysy
