Jurttyń jaqsylyqty, jylylyq pen sulýlyqty saǵynǵany seziledi. Barlyq uıym, barsha ujymda kóktem merekelerin aıta júrerlikteı atap ótýge degen umtylys bar. Jańadan úrdiske ene bastaǵan árbir ataýly kúnge mán syılaýǵa degen ádemi qulshynys bar.
Degenmen osylardyń ishindegi eń úlken syı – dúnıege meıram kúnderi kelip jatqan sábıler. Mysaly, Almatydaǵy №4 qalalyq perzenthanada Shańyraq kúni on bala dúnıege kelse, onyń tórteýi – ul, al altaýy qyz eken.
Otbasylyq qundylyqtardy ulyqtaýǵa arnalǵan merekede perzenthana ujymy da qarap qalmaı, qol-aıaǵyn endi baýyryna jınaǵan analardy sábıli bolýymen quttyqtap, «Naýryz – bazar» estelik syılyqtaryn tapsyrdy. Syılyqtarǵa qosa, perzenthana ujymy jas analarǵa ónerden shashý shashyp, dastarqan jaıyp, dástúrli ulttyq taǵamdaryn ortaǵa qoıdy.
Osynaý erekshe sátke BAQ ókilderi de qosylyp, nárestelerin meıirlene, qushaǵyna qushyrlana basqan analarmen dıdarlasyp, áserli sátterine kýá boldy.
Aıtqandaı, Shańyraq kúninde shańyraǵyna tórtinshi balasymen oralǵaly otyrǵan 31 jastaǵy Erıka: «Bul merekede úlken mán, nyshan bar. Naýryz qarsańynda bosanyp, ásirese qyzymnyń dúnıege kelýi otbasylyq qundylyqtar kúnimen tuspa-tus kelgenin jaqsy yrymǵa baladym. Qazir qandaı qýanyshqa kenelip otyrǵanymdy sózben jetkizý qıyn. Ana bolý – úlken baqyt. Bizdi elden erekshe, saltanatty túrde quttyqtap, syı-sııapat usynǵan perzenthana ujymy qýantty. Barsha otandastarymyzdy kele jatqan Naýryz merekesimen quttyqtaımyn jáne barshańyzǵa zor densaýlyq, beıbitshilik, órkendeý, ár úıge amandyq pen otbasynyń tatýlyǵyn tileımin!», dedi.
ALMATY
