Foto: bestdoctor.kz
University Medical Center ortalyǵynyń habarlaýynsha, Bekbaı Haırýlın uzaqqa sozylǵan dertinen qaıtys boldy.
«Búgin tańerteń 64 jasynda bizdiń qymbatty dosymyz, áriptesimiz jáne jaı ǵana meıirimdi, janashyr adam, pedıatr, UMC medısına ortalyǵynyń dırektory Bekbaı Eslıamuly Haırýlın qaıtys boldy. Áriptesteri men emdelýshilerdiń qurmeti men súıispenshiligine ıe bolǵan Bekbaı Eslıamuly sanaly ǵumyryn adamdarǵa rııasyz kómek kórsetýge arnady. О́ziniń eńbek jolynda densaýlyq saqtaý salasyn damytýǵa, talaı adamnyń ómirin saqtap qalýǵa ólsheýsiz úles qosty. UMC ujymy orny tolmas qazaǵa qaıǵyryp, Bekbaı Eslıamulynyń otbasy men jaqyndaryna kóńil aıtady», dep jazdy UMC.
Bekbaı Haırýlın – medısına ǵylymdarynyń kandıdaty, «emdeý isi» mamandyǵy boıynsha dosent, joǵary sanatty dáriger. A.V.Lýnacharskıı atyndaǵy Astrahan memlekettik medısına ınstıtýtyn pedıatrııa mamandyǵy boıynsha bitirgen.
2009 jyldan bastap «Ulttyq medısınalyq holdıng» AQ kompanııalar tobynda qyzmet atqardy:
«Ana men bala ulttyq ǵylymı ortalyǵy» AQ dırektory;
- «Ulttyq medısınalyq holdıng» AQ Klınıkalyq qyzmetti basqarý jáne baqylaý departamentiniń dırektory;
- «Ulttyq medısınalyq holdıng» AQ bas klınıkalyq aýdıtory;
- «Respýblıkalyq jedel medısınalyq járdem ǵylymı ortalyǵy» AQ medısınalyq kómekti uıymdastyrý jáne sapasyn baqylaý bóliminiń basshysy.
2009 jylǵa deıin – Densaýlyq saqtaý mınıstrliginiń bas pedıatr dárigeri, Emdeý-profılaktıka departamenti ana men bala densaýlyǵyn qorǵaý basqarmasynyń bastyǵy, Medısınalyq qyzmet kórsetý salasyndaǵy baqylaý komıtetiniń medısınalyq qyzmet sapasyn baqylaý bóliminiń bastyǵy, oblystyq densaýlyq saqtaýdy damytýdy baqylaý departamentiniń meńgerýshisi bolyp qyzmet atqarǵan. Medısınalyq qyzmet kórsetý salasyndaǵy baqylaý komıtetiniń Astana qalasy boıynsha departamenti dırektorynyń orynbasary boldy.
