26 naýryz kúni Oral qalasynda jáne oblystyń 9 aýdanynda toqtaýsyz jańbyr jaýyp, qysqy qardy eritip jiberdi. Nátıjesinde Aqjaıyq, Bórli, Báıterek, Qaztalov, Qaratóbe, Syrym, Tasqala, Terekti jáne Shyńǵyrlaý aýdandarynda tasqyn sý basý qaýpi týdy. Qar men jańbyr sýy aryqtar men kárizderge tolyp, 3 áleýmettik nysannyń jáne kópqabatty 5 úıdiń jertólesine quıylyp, 298 jeke úıdiń aýlasyn basty. Qaýip tóngen aımaqtarǵa qum salynǵan qapshyq jetkizilip, sýdy sorý jumysy uıymdastyrylǵan.
Batys Qazaqstan oblysynyń ákimi Narıman Tóreǵalıev Oral qalasynyń Zashaǵan kentindegi sý basý qaýpi bar shaǵyn aýdandarǵa, Saratov tasjolyndaǵy sý arnasy júıesine, sondaı-aq, Oral qalasynyń eski ortalyq kóshelerine baryp, jaǵdaıdy kózimen kórdi. Tótenshe jaǵdaılar departamentine, qala ákimdigine jáne kommýnaldyq qyzmet salasynyń mamandaryna – qar, jańbyr sýlaryn ýaqtyly shyǵarý, joldardy bógeý, qapshyqtarmen qum tóseý, sý arnalary men qubyrlardy tazalaýdy tapsyrdy.
Qazir sý tasqynynyń aldyn alý boıynsha arnaıy oblystyq shtab táýlik boıy jumys istep jatyr. «112» jáne «109» telefondaryna sońǵy bir táýlik ishinde 1104 qońyraý túsipti. Osynyń ishinde 792 ótinish boıynsha naqty is-shara jasalsa, 312 ótinish baqylaýǵa alynǵan. Budan bólek, jedel jelige de 56 qońyraý túsipti. Bulardyń bir de biri nazardan tys qalmaıdy.
Qarǵyn sý avtokólik joldaryna da qaýip tóndirip jatyr. Kúre joldardyń 19 jerinde osyndaı jaǵdaı tirkelgen. Respýblıkalyq jáne oblystyq dárejedegi 2 joldyń, aýdandyq dárejedegi 17 joldyń ústinen sý ótip ketken. Aqjaıyq, Jánibek, Terekti, Syrym jáne Qaratóbe aýdandaryndaǵy sý basqan joldarǵa kezekshilik, arnaıy belgiler ornatylǵan. «Ázirge eldi mekenderge qaýip joq» deıdi tótenshelikter. Jergilikti ákimdikterdiń 45 qyzmetkeri men 13 tehnıkasy, polısııa departamentiniń 6 qyzmetkeri men 3 kóligi, «Oral joldary» mekemesiniń 4 ókili men 1 kóligi qaýipti aımaqtarda kezekshilikte tur.
Túngi saǵat 12:00-de oblystyq jedel shtab bastyǵy, oblys ákiminiń orynbasary Qalııar Aıtmuhambetovtiń tóraǵalyǵymen jıyn ótip, aýdan basshylarynyń sý tasqynynyń aldyn alý boıynsha esebi tyńdaldy. Joǵaryda aıtylǵan áleýmettik mekemeler men turǵyn úılerdiń jertólesine kirgen sý toqtatylyp, tóngen qaýiptiń beti qaıtqan.
Qaratóbe men Syrym aýdandarynda qalyptasqan kúrdeli jaǵdaıǵa baılanysty qosymsha kúsh jumyldyrylyp jatyr.
«Qazgıdromet» mekemesiniń málimetine qaraǵanda Tasqala aýdanynda Ekinshi Shejin jáne Derkól ózenindegi sý deńgeıi kóterilgeni baıqalǵan. Jol-jónekeı qosylǵan sýlardyń áserinen ózen kemerinen asyp ketýi múmkin. Ekinshi Shejinniń qaýipti deńgeıi 780 sm bolsa, qazir ol 739 sm-ge jetip qalǵan. Jergilikti ákimdik 5000 dana qapshyq, 100 tonna ınertti materıal daıarlap, saqadaı saı otyr. Aýylda qaýipti jaǵdaı týsa, turǵyndardy kóshirip ornalastyrý úshin 2 beket ázirlengen.
«О́ńir boıynsha jaǵdaı kúrdeli, biraq barlyq deńgeıde saqtyq sharalary jasalǵan, jedel shtab jumys istep otyr, jergilikti bılik oryndary, azamattyq qorǵanys qyzmeti jedel kómek kórsetýge ázir», dep habarlady Tótenshe jaǵdaılar departamentiniń baspasóz qyzmeti. Joǵaryda aıtylǵandaı, oblys ákiminiń buıryǵymen barlyq mańyzdy qyzmet oryndary táýlik boıy jumys rejimine kóshken.
Sońǵy málimetterge qaraǵanda oblys aýmaǵynda 131616 m3 sý sorylyp, qum salynǵan qapshyqtyń 5730 danasy qaýipti jerlerge tóselgen. Bir mezgilde túrli qyzmetten 990 adam, 222 tehnıka, 153 motosorǵy tasqynnyń betin qaıtarýǵa jumylyp jatyr. Aıta keteıik, qutqarý jumystarynyń alǵy shebinde áskerı bólim sarbazdary da júr.
Keı jerde avtojoldardyń ústinen sý ótkenin aıtqan edik. Olar Aqjaıyq aýdany, Qýraılysaı aýyldyq okrýgindegi Átibek qystaǵy mańynan ótetin «Juban-Saıqudyq» avtojolynyń 7-inshi shaqyrymy, Jánibek aýdany, Jaqsybaı aýyldyq okrýgindegi «Jánibek-Talovka-Kishi ózen» avtojolynyń 3 oıpatty ýchaskesi, Terekti aýdany, Shalqar aýyldyq okrýgindegi Saryómir aýylynan 9 shaqyrym jerde, «Saryómir-Dýana» avtojolynyń 2 oıpatty ýchaskesi, osy aýdannyń Ańqaty aýyldyq okrýgindegi Qandyq aýyly mańyndaǵy «Saryómir-Ańqaty» avtojoly jáne «Terekti-Aqsaı» avtojolynyń 19 shaqyrymy. Qazir Dýana aýylymen kólik baılanysy joq. Qalǵan eldi mekenderge aınalma joldar bar, turǵyndarǵa qaýip tónbegen. Joldyń qaýipti tustaryna arnaıy belgi ornatylyp, kezekshi qoıylǵan.
Batys Qazaqstan oblysy
