Kosmomonıtorıng derekteri boıynsha búginde oblys aýmaǵynyń 61 paıyzyn qar alyp jatyr. О́ńirdegi ózenderden de tónip turǵan qaýip ázirge joq. О́z arnalarynda. Iаǵnı sý tasqyny boıynsha jaǵdaı turaqty. Eldi mekenderdi, qaladaǵy úı-jaılardy sý basý tirkelgen joq.
Tótenshe jaǵdaılar departamenti men jergilikti ákimder bul máseleni qatań baqylaýynda ustap otyr. Qamdanys bar. 3 765 tonna janar-jaǵarmaı, 171 tonna azyq-túlik, 64 myń tonna ınertti materıal, 145 myń sómke ázirlendi. Buǵan qosa 2 mln 600 myń tekshe metrden asa qar shyǵaryldy. 45 shaqyrymdyq sý burý transheıalary kesildi, 137 shaqyrymdyq kanaldar men aryqtar, 4 635 sý ótkizý qubyry, 441 kópir tolyǵymen tazartyldy.
«Samarqand sý qoımasynan sekýndyna 20 tekshe metr, Yntymaq sý qoımasynan 6,4 tekshe metr kóleminde sanıtarııalyq tógindiler júrgizilip jatyr. Azamattyq qorǵaýdyń aýmaqtyq kishi júıesiniń barlyq kúshteri men quraldary joǵary daıyndyqqa keltirilgen. Sany 4 125 adam, 1 754 tehnıka, onyń ishinde TJD bólimshelerinen 360 adam, 70 tehnıka ázir. Azamattyq qorǵaý qyzmetterin, uıymdardy, áskerı qolbasshylyq organdary men polısııa departamentinen 3 675 qyzmetker, 1 631 tehnıka daıyn», deıdi Tótenshe jaǵdaılar departamentiniń basshysy Murat Qatpanov.
Jalpy aýdany 3 800 tekshe metr bolatyn 2 ýchaskede muzdy kesý jáne burǵylaý júrgizildi. Departament qyzmetkerleri jaǵdaıdy monıtorıngteý maqsatynda sý tasqyny qaýpi bar eldi mekenderdi táýlik boıy aralap júr. Mundaı kezeńde halyqty aqparattandyrý máselesi asa mańyzdy. Bul baǵyt boıynsha departament qyzmetkerleri jumysyn kúsheıtken. Máselen, 28 myńnan asa adamdy qamtyǵan halyqpen 286 jıyn ótkizildi. Halyqqa 25 myńnan asa jadynama paraǵy tabystaldy.
«Oblystyń telearnalary boıynsha sý tasqyny kezeńinde TJ aldyn alý máseleleri boıynsha 42 habar efırge shyqty, radıo toraptary arqyly 1 300-den asa eskertý habary tarady, basylymdarǵa 32 materıal shyqty. Áleýmettik jelilerde 257 materıal jarııalandy. Jalpy, sý tasqyny kezeńine daıyndyq jumystary júrgizilýde jáne erekshe baqylaýda», deıdi Murat Qasenuly.
Jaqynda oblys ákimi Ermaǵanbet Bólekpaev pen Tótenshe jaǵdaılar jónindegi oblystyq departamenttiń basshysy Murat Qatpanov Qarqaraly aýdanyndaǵy jumys saparynda birqatar aýyldyq okrýgterdi aralap, kóktemgi sý tasqynyna ázirlik jumystarymen tanysqan edi. Oblys basshysy sý tasqyny bolý yqtımaldylyǵy basym sanalatyn Yntaly, Ýgar, Qarshyǵaly, Tegisshildik jáne N.Ábdirov aýyldyq okrýgterindegi sý ótkizgish qubyrlardyń, kópirler men sý bógetteriniń jaǵdaıyn kórdi. Munyń aldynda aımaq basshysy Buqar jyraý aýdany Ǵabıden Mustafın kentine, Sadovoe men Chkalovo aýylyna, Aqtaý kentindegi Myrza stansasyna baryp, ahýaldy kózimen kórip qaıtqan edi.
Qaraǵandy oblysy
