Oblystyq TJD bastyǵy Nurǵalı Júnisovtyń habarlaýynsha, evakýasııa sharalaryna 547 adam tartylǵan. Azamattardy qaýipsiz jerge kóshirýge oblystyq ákimdik qyzmetkerleri, qutqarýshylar, polıseıler, áskerıler, volonterler jáne óz bastamasymen kelgen qala turǵyndary tartyldy. Turǵyndar tastap ketken úılerin qazir polısııa qyzmetkerleri kúzetip tur.
Beısenbi kúni keshkilik qala ákimi Azamat Beket oblys ortalyǵynda tótenshe jaǵdaı jarııalaýǵa Aqtóbe sý qoımasyndaǵy sý kóleminiń shektik mólsherge jetýi sebep bolǵanyn málimdedi. Tolassyz jaýǵan jańbyr men qar sýynan Aqtóbe sý qoımasyna bir táýlikte 150 mln tekshemetr sý jınalyp, plotınanyń shegine jetip qaldy. Eger artyq sýdy Elek ózenine jibermese, plotına jarylyp, qala tutas sý astynda qalýy múmkin. Túni boıy Aqtóbe sý qoımasynan jiberilgen sý Elek ózenine jaqyn aýmaqtar men Kirpishti eldi mekenin basyp qaldy.
Aqtóbe qalasynyń túbinde úsh sý qoımasy bar: eń úlkeni – syıymdylyǵy 280 mln tekshe metr bolatyn Qarǵaly sý qoımasy. Oǵan Qarǵaly ózeni quıady. Byltyr dál osy ýaqytta osy sý qoımasynyń 185 mln tekshe metri bos turdy. Oǵan quıatyn Qarǵaly ózenindegi sý deńgeıi de joǵarylap, janyndaǵy eldi mekenderge qaýip tóndirip tur. Ekinshisi – syıymdylyǵy 245 mln tekshe metr bolatyn Aqtóbe sý qoımasy. Sońǵy kúnderi mundaǵy sý kólemi 68 %-dan asqan. Eń kishisi – 7,5 mln tekshe metr sý jınalatyn Sazdy sý qoımasy. Qazir ol da toldy, artyq sý Sazdy, kishi Sazdy ózenderine jiberildi.
Oblys ákimi Ashat Shaharov sý tasqynynan zardap shekken turǵyndarǵa materıaldyq kómek beriletini týraly málimdedi. Qazirgi ýaqytta Muǵaljar aýdanynyń Birlik, Sheńgeldi, Embi eldi mekenderin, Qobda aýdanynyń birneshe aýylyn, Áıteke bı aýdanynyń Ulǵaısyn, Tasótkel, Qopa eldi mekenderin, Yrǵyz aýdanynyń Aqshı, Janys bı, Sheńbertal aýyldaryn sý basty. Sondaı-aq Oıyl aýdanynyń Ekpetal, Jańabaz, Qarasý aýyldarynyń turǵyndary da kóshirilip, Oıyl eldi mekenindegi mektepke ýaqytsha ornalastyryldy.
Aqtóbe oblysy
