Sońǵy aqparattarǵa qaraǵanda, oblysta sý tasqynyna qarsy jumystarǵa tótenshe jaǵdaılar departamenti, jergilikti atqarýshy organdar, Qorǵanys mınıstrligi, Ulttyq ulan jáne Ishki ister mınıstrliginen 998 adam 300 tehnıkamen, 124 motosorǵymen jumylyp jatyr.
Oblys boıynsha 25 naýryzdan beri 453 myń tekshe metr erigen qar sýy sorylyp, ınertti materıal salynǵan 42 950 dana qap tóselgen.
«Qardyń qarqyndy erýi jáne jańbyr túrinde jaýyn-shashynnyń kóp túsýi nátıjesinde erigen jáne jańbyr sýy, sondaı-aq káriz aǵyndarynyń nátıjesinde, barlyǵy 455 turǵyn úı sý astynda qaldy», dep málimdedi tótenshelikterdiń baspasóz qyzmeti.
О́tken túnde Batys Qazaqstan oblysyna Mańǵystaý oblysy tótenshe jaǵdaılar departamentiniń jeke quramynan 46 adam 5 tehnıkasymen, 8 motosorǵy jáne 2 qaıyǵymen kómekke keldi. Olar Oral qalasynda jáne Bórli aýdanyndaǵy jumystarǵa tartyldy.
Buǵan deıin О́leńti, Jaqsybaı ózenderi tasysa, endi Shyńǵyrlaý ózeni deńgeıi kóterilip, ózen aınalasyndaǵy eldi mekenderdi sý basý qaýpi týdy. Qazirgi ýaqytta Bórli aýdanynyń Aqsý kentinde 161 adam evakýasııalanǵan.
Naýryzdyń 28-i kúni Qorǵanys mınıstrliginiń eki tikushaǵymen Qaratóbe aýdanynyń 271 turǵyny qaýipsiz jerge evakýasııalandy. Aýdanda evakýasııalyq jumystar áli jalǵasyp jatyr.
Terekti aýdanynda da qajetti ınjenerlik is-sharalar atqarylsa, Syrym aýdanynda erigen qar sýy sorylyp jatyr.
Budan buryn habarlaǵanymyzdaı, Oral qalasynda, Qaratóbe, Syrym, Bórli jáne Terekti aýdandarynda jergilikti aýqymda tabıǵı sıpattaǵy tótenshe jaǵdaı jarııalanǵan edi.
Aımaq boıynsha jaǵdaı oblys ákimi jáne BQO TJD bastyǵynyń mindetin ýaqytsha atqarýshynyń erekshe baqylaýyna alyndy.
Apat aýmaǵynda zardap shekken turǵyndarǵa aldymen qol sozǵan uıymnyń biri – «AMANAT» partııasy músheleri. Partııanyń bastaýysh uıym tóraǵalary men músheleri, partııanyń belsendi azamattary oqıǵa ornynda halyqpen birge bolyp, barynsha kómek kórsetip jatyr. «Jastar rýhy» belsendileri táýlik boıy kezekshilikte júrgen tótenshe jaǵdaı departamenti qyzmetkerlerine aýyzashar ýaqytynda ystyq tamaq úlestirip, qoldaý bildirdi. Al oblystyq, qalalyq máslıhat depýtattary oblystyq partııa janyna ashylǵan esepshotqa materıaldyq kómek retinde qarajat aýdaryp, barlyq deńgeıdegi partııa fılıaldarynyń qyzmetkerleri birkúndik jalaqysyn aýdaryp kómek kórsetti. Gýmanıtarldyq kómektiń alǵashqy partııasy – 4 tonna júk 28 naýryz kúni Qaratóbe aýdanyna jetkizilse, 29 naýryzda dál osyndaı kólemde kómek Syrym aýdany turǵyndaryna jiberildi.
«Tótenshe jaǵdaı rejımi jarııalanǵan birqatar aýdandardaǵy eldi meken turǵyndarymen kezdesip, olardyń aryz-tilegin tyńdap, sý basqan úılerdiń jaǵdaıymen tanysý úshin oblystyq jáne qalalyq máslıhat depýtattary, Jastar rýhy belsendileri jáne oblystyq partııa fılıaly qyzmetkerleri oqıǵa ornynda júr», dep habarlady «AMANAT» partııasy BQOF baspasóz qyzmeti.
Batys Qazaqstan oblysy
