Sotta Gastro ortalyqtyń jalǵa berý bóliminiń basshysy Qalmurat Moldaqash kýálik etti. Ol óz sózinde is boıynsha ekinshi kúdikti Baqytjan Baıjan Gastro ortalyqtaǵy beınekameralarǵa túsken jazbalardy óshirýdi suraǵanyn rastady.
«Sol kúni saǵat 13:00-de ortalyqtyń birinshi qabatynda barlyǵy jumys istep turǵan. Biraq 2-shi qabatta eshkim bolǵan joq. Sonda men ákimshi Gúlzada Ismaılovaǵa baryp, restorannyń nege ashylmaǵanyn surastyrdym. Ol «Baý» restoranynda sanıtarlyq kún dep qysqa qaıyrdy. Bir saǵattan keıin, ıaǵnı, 14:00-de Gúlzada Ismaılova kabınetke kelip: «Baqytjan Baıjan habarlasty, Gastro ortalyqtaǵy beınekameralarǵa túsken jazbalardy óshirý kerek», dedi. Keıin Baqytjan Baıjannyń ózi kabınetke kelip, oǵan kómektesýdi surady», dedi kýáger.
Onyń aıtýynsha, oqıǵa bolǵan kúni ortalyq basshysy men ákimshi ózderin óte baısaldy ustaǵan. Sondaı-aq Gastro ortalyqta júıelik admınıstratorlar jumys istemeıdi.
«Biz dıspetcherlik kabınettiń kiltin aldyq. Baqytjan Baıjan Gúlzada Ismaılovaǵa barlyq beınejazbany óshirýdi tapsyrǵan. Sol kezde beınejazbalardy birtindep óshire bastadym. Barlyq materıaldardy 15 mınýttyń ishinde óshirip tastadym. Qasymda Gúlzada boldy, keıin Baqytjan Baıjannyń ózi de keldi. Tapsyrmany oryndap bolǵan soń kabınetti kilttep, óz jumysyma qaıta oraldym», dedi Qalmurat Moldaqash.
(Vıdeodan alynǵan kadr)
Osy tusta kýáger beınejazbaǵa túsken kadrlardy kóremegenin alǵa tartty. Basshylyq buǵan deıin osyǵan uqsas tapsyrma berip kórmegen, sondyqtan beınejazbany óshirý sebebin de suramaǵanyn aıtty.
Keıin, saǵat 16:00-de Baqytjan Baıjan Qalmurat Moldaqashtan músátir spırtin ákelýdi ótingen. Biraq ne úshin kerek ekenin túsindirmedi.
«Baqytjan Baıjan shuǵyl túrde spır ákelýimdi surady, men ortalyq janyndaǵy saýda ortalyǵyna baryp, suraǵan zatyn alyp keldim. Spırttiń ne úshin keregin suramadym», dep sendirdi kýáger.
Kýáger kisi ólimi týraly tek 20:00-ge qaraı bilgenin aıtty.
«20:00-ge qaraı ákimshi Gúlzada habarlasyp, ortalyqta tótenshe jaǵdaı bolǵanyn jarııalady. Sol kezde biz basqa is-sharada otyrǵan edik. Ol ǵımarat aınalasynda polısııa qyzmetkerleri qaptap ketkenin aıtty. 2-qabatta kisi ólimi bolǵanyn sol kezde bildik», dep túsindirdi Qalmurat Moldaqash.
