Foto: Vedomstvo baspasóz qyzmeti
Abaı oblysynda áskerı qyzmetshiler Aıagóz aýdany Mamyrsý aýylyndaǵy dambyny kúsheıtý úshin 1700 tekshe metr topyraq ákelip, 340 metr úıindi jasady.
02352 áskerı bóliminiń on bir áskerı qyzmetshisi Shyǵys Qazaqstan oblysy Kúrshim aýdany Boran aýylynda jumysqa kiristi. Munda Qara Ertis ózenindegi muzdyń kúrt erýi saldarynan sý deńgeıi birden kóterilgen. Sý tasqynyna qarsy sharalarǵa 4 jol talǵamaıtyn avtokólik pen júk kamazy bólindi.
Qaraǵandy oblysy ákiminiń jazbasha ótinishi boıynsha oblys ortalyǵynan Shet aýdanynyń Nurataldy aýylyna 49 áskerı qyzmetshi jáne «Astana» óńirlik qolbasshylyǵynan bes avtomobıl tehnıkasy jiberildi. Apatty aımaqtaǵy sharalar ári qaraı júrgiziledi.
Áýe qorǵanysy kúshteriniń ushý ekıpajdary oblystarda, atap aıtqanda Batys Qazaqstan (Qosoba, Qaratóbe, Qorjyn, Qozybas eldi mekenderinen), Aqtóbe (Oıyl, Sh.Bersıev aýyldarynan), Qostanaı (Qyzyljuldyz, Ekidiń aýyldarynan) adamdardy kóshirip júr.
Naýryzdyń 27-29 kúnderi apattan qutqarý sharalaryna barlyǵy 480 áskerı qyzmetshi, 37 birlik avtokólik tehnıkasy, 6 tikushaq jáne áskerı-kóliktik avıasııa ushaǵy jumyldyryldy.
Sý basqan aýdandardan 900-den astam adam kóshirildi, onyń 90-nan astamy - bala. Erigen qar sýyna bóget jasaý úshin shamamen 9500 myń qum qaptalyp, tóseldi. 300 metr aǵyn sý kárizi tazartyldy. Tótenshe jaǵdaılar mınıstrliginiń jeke quramy Almatydan Oral jáne Aqtóbe qalalaryna jetkizildi.
