«Búgingi tańda oblys boıynsha 14 qaýipti ýchaske baqylaýǵa alynyp, onda 133 adam, 51 birlik arnaıy tehnıka, 35 motopompa jumyldyryldy. Pavlodar men Tereńkól aýdandarynyń, sondaı-aq Aqsý qalasy ákimderiniń jumysyn qanaǵattanarlyqsyz dep sanaımyn. Sý tasqynyna qarsy is-sharalardy júrgizýdegi baqylaýdyń álsizdigi úshin olarǵa qatań sógis jarııalandy. Meniń tapsyrmam boıynsha barlyq sý tasqynyna qarsy is-shara aǵymdaǵy jaǵdaı týraly saǵat saıyn beriletin eseppen táýliktik rejimge aýystyryldy jáne meniń jeke baqylaýymda», dedi oblys ákimi Asaıyn Baıhanov.
О́ńirlik tótenshe jaǵdaılar departamenti baspasóz qyzmetiniń habarlaýynsha, qazirgi ýaqytta Pavlodar, Maı, Ýspen, Pavlodar, Sharbaqty, Aqtoǵaı, Ertis aýdandary men Aqsý qalasynyń jekelegen eldi mekenderi boıynsha 21 ýchaske aıryqsha baqylaýǵa alynǵan. Birqatar eldi mekende úı aýlalaryn, sharýashylyq ǵımarattaryn sý basqany týraly aqparattar túsken edi. Jergilikti atqarýshy organdar men tótenshe jaǵdaılar qyzmetkerleri sý jyrý, sorý jumystaryn jalǵastyryp jatyr.
Buǵan qosa avtomobıl joldarynyń 6 ýchaskesi baqylaýda tur. О́tken táýlikte eldi mekenderden 420 tonna qar shyǵarylsa, qaýipti ýchaskelerden 30 myń tekshe metr sý sorylyp alynǵan. TJD qyzmetkerleri men jergilikti atqarýshy organdar eldi mekenderge táýlik boıy monıtorıng júrgizip otyr. Oǵan drondar da qosylǵan.
Apta basynda Pavlodar qalasy men Atameken kentin, Aqsý qalasy men Pavlodar aýdanyndaǵy kóshelerdi sý basý jaıttary tirkelgen.
Pavlodar oblysy
