«Keler urpaq Sháken aǵamyzdyń qandaı adam bolǵanyn, onyń ómiri qalaı órilgenin bilsin degen nıetten týyp otyr. Jınaqqa Oljas Súleımenov, Ábish Kekilbaev, Asanáli Áshimov, Bıbigúl Tólegenova, Ákim Tarazı, Áshirbek Syǵaı jáne áıgili ártispen ıyq tiresip jumys istegen ózge de óner qaıratkerleriniń estelik maqalalary endi. Kólemi 345 bet bolyp shyqty. Sháken aǵa qandaı fılm túsirse de, ulttyq qundylyqtardy dáriptegen. Osy erekshelikterdi negizgi ustanym etip, kitaptyń baıanyna sińirdik», dep atap ótti kitaptyń qurastyrýshysy, fılologııa ǵylymdarynyń kandıdaty, S.Toraıǵyrov ýnıversıtetindegi E.Bekmahanov atyndaǵy ólkeniń tarıhy men mádenıetin zertteý ortalyǵynyń dırektory Amantaı Qudabaev.
Kitaptyń tusaýkeserine oraı Sháken Aımanovtyń 110 jyldyǵyna arnalǵan halyqaralyq ǵylymı-praktıkalyq konferensııa ótti. Oǵan Pavlodar oblysynyń ákimi Asaıyn Baıhanov, Qazaqstannyń eńbek sińirgen qaıratkeri, kınorejısser, ssenarıst, prodıýser, Qazaq ulttyq óner ýnıversıtetiniń professory Slambek Táýekel, Qazaqstannyń eńbek sińirgen ártisi Shahımardan Ábilov, teatr jáne kıno akteri Ergenbaı Ábý jáne S.Toraıǵyrov ýnıversıtetiniń ǵalymdary qatysty.
– Sháken Aımanov – qalypqa syımaıtyn tulǵa edi. Qazaq kıno óneriniń negizin salýshylardyń biri bolyp qana qoıǵan joq, ony álemge tanytyp, moıyndatty. Onyń Reseıde, KSRO-nyń ózge elderinde, shet memleketterde dostary kóp edi. Men Máskeýde bilim alyp júrgende Sháken aǵa issaparmen kele qalsa qazaq jastaryn izdep, arnaıy qonaq etetin. Bizge óz qolymen palaý basyp berýshi edi jaryqtyq. Qarapaıymdylyǵynda shek joq. Birde Máskeýde ótken festıvalde aǵylshyn-amerıkan aktrısasy Elızabet Teılormen juptasyp bılep, birinshi oryndy jeńip aldy. Al endi ázilqoılyǵy bólek ónertuǵyn. KSRO kıno jáne teatr maıtalmandarynyń arasynda abyroı-bedeli óte bıik boldy. 1970 jyly jeltoqsan aıynda týǵan eline súıegin alyp ketýge barǵanymyzda Máskeýdiń búkil zııaly qaýymy kúńirenip qoshtasty, – dep tebirendi Slambek Táýekel.
Shahımardan Ábilov te rejısserden tárbıe alyp, taǵylymyn kórgen jan. Ol Sháken aǵanyń Londondaǵy halyqaralyq festıvalde Otellonyń monologin qazaq tilinde oqyp, akterlik sheberligimen jergilikti kórermendi tánti etkenin, sońynan gran-prı júldesi taǵy bir aktermen qosa Aımanovqa da berilgenin maıyn tamyza áńgimeledi.
Konferensııada Buqar jyraý atyndaǵy ádebıet jáne óner mýzeıi Sh.Aımanov pen Káýken Kenjetaevtyń shyǵarmashylyǵy men ómiri jaıynda kórme usyndy.
Pavlodar oblysy
