«Búgin kórnekti memleket jáne qoǵam qaıratkeri, Parlament Senatynyń alǵashqy tóraǵasy О́mirbek Baıgeldi ómirden ótti. Osyǵan oraı aǵamyzdyń otbasyna arnaıy baryp, jary Mánsııa apaıǵa jáne jaqyndaryna kóńil aıtyp shyqtyq.
О́mirbek Baıgeldiuly – egemen elimizdiń eńse tiktep, irge bekitýine zor eńbek sińirgen tulǵa. Azattyq alǵan kezeńde ózi týǵan Jambyl oblysynyń alǵashqy ákimi bolyp, óńirdiń damýy jolynda aıqyn qoltańbasyn qaldyrdy.
1995 jyly Senat depýtaty retinde saılanyp, táýelsiz Qazaqstan tarıhynda Parlament Senatynyń alǵashqy tóraǵasy boldy. Osylaısha, ulttyq parlamentarızmniń qalyptasýyna úlken úles qosty.
О́mirbek Baıgeldiuly budan bólek taǵy úsh shaqyrylymda senator bolyp, ultqa qyzmet etýdiń ozyq úlgisin kórsetti. Qyzmetten keıin de Senatorlar keńesiniń múshesi retinde Palata jumysyna, jalpy el ómirine belsendi aralasyp keldi. Aǵamyzdyń ǵıbratty ǵumyry qashanda kópke úlgi, urpaqqa ónege bolyp qala beredi. Onyń jarqyn beınesi árdaıym bizdiń jadymyzda saqtalady», delingen jazbada.
Eske salaıyq, buǵan deıin biz Senattyń alǵashqy tóraǵasy ómirden ótkenin habarlaǵan edik. Prezıdent asa kórnekti memleket jáne qoǵam qaıratkeri, Parlament Senatynyń tuńǵysh tóraǵasy, «Otan» ordeniniń ıegeri, akademık О́mirbek Baıgeldiulynyń dúnıeden ótýine baılanysty onyń otbasy men jaqyn týystaryna kóńil aıtty.
