«Qyzyl Jarty Aı» qoǵamynyń Pavlodar óńirlik fılıalynyń dırektory Gúlnar Isaqanova eriktiler naýryz aıynyń sońynan beri qarǵyn sýdan zardap shekken aýyldardy aralap, kómek kórsetip jatqanyn aıtty.
«Buǵan deıin bizdiń volonterler Ýspen, Aqtoǵaı, Ertis aýdandaryndaǵy sý basqan aýyldarǵa bardy. Biz Ýspen aýly men Aqtoǵaıdyń Jalaýly aýlyndaǵy topan sý ortasynda qalǵan úılerdi aralap, qarǵyn sýdan kelgen zııandy óz tarapymyzdan baǵaladyq. Adamdarǵa jyly kórpeler men jylytqyshtar, etikter, jyly kıimder tarattyq. Jalaýly aýlynda 14 úıdi sý basqan eken. Ondaǵy 3–4 úı bos tur, otbasy músheleri ózge jerge ornalasqan. Qalǵandaryna gýmanıtarlyq kómek kórsettik. Turǵyndarǵa jyly kúrtesheler, etikter, jylytqyshtar berdik. Jalpy salmaǵy 200 kg bolatyn gýmanıtarlyq kómek kórsetildi. Buǵan qosa keshe Ertis pen Aqqýly aýdandarynyń árqaısysyna 300–400 kg gýmanıtarlyq kómek jóneltildi», dep habarlady fılıal jetekshisi.
Qoǵam ókilderi jaqyn kúnderi óz seriktesterinen taǵy 5 tonnadaı kómek keletinin, olardyń denin kıim-keshekter quraıtynyn aıtady. Bul kómekti Tereńkól, Ýspen, Jelezın, Maı aýdandaryna jiberý josparda tur. G.Isaqanovanyń sózinshe, sý basqan aýyldarǵa volonterlerdiń turaqty kómeginiń qajeti joq. Sondyqtan olar turǵyndardyń kúndelikti ómirine qajetti zattar men buıymdardy jetkizip berip tur. Búginde Pavlodar oblysy boıynsha «Qyzyl Jarty Aı» qoǵamynyń 10 ókili jumys istep jatyr.
Buǵan qosa Pavlodardaǵy Jastar bastamalaryn damytý ortalyǵynda sý tasqynynan zardap shekkender úshin gýmanıtarlyq kómek jınaý pýnkti ashyldy. Al Ekibastuzdaǵy «Vita» eriktileri de gýmanıtarlyq aksııany bastap ketti.
Pavlodar oblysy
