Atyraý oblysy ákiminiń orynbasary Jasulan Bısembıevtiń aıtýynsha, Jylyoı aýdanynda sý tasqynyna qarsy daıyndyq eki apta júrgizilgen. Keıingi birneshe kúnnen beri sý tasqynymen kúres júrip jatyr.
«Biraq tasqyn sý Qulsary qalasyn basyp ketti. Zardap shekken baýyrlarymyzǵa barlyq kómek kórsetilip jatyr. Shyǵyn kólemi óteledi. Degenmen, Atyraý qalasy da bul «taǵdyrdy» qaıtalaýy múmkin. Sý basý qaýpi Reseıdegi Orynbor, kórshiles Oral qalalaryndaǵy tasqynnan kem bolmaıdy degen boljam bar. Álbette daıyndyq júrip jatyr. Bes kúnnen beri óńirdiń qurylys, munaı salalaryndaǵy 26 kompanııa Jaıyq ózeniniń jaǵalaýyn bekitýge, qorǵanys bógetin salýǵa jumyldyryldy. Qajetti qap, kúrek jáne ınertti materıaldardyń rezervi daıyndaldy», dedi Jasulan Bısembıev.
Ákim orynbasarynyń pikirinshe, Jaıyq ózenine sý Reseıdiń Orynbor oblysyndaǵy Irıkla sý qoımasynan jiberilip jatyr. Sý Batys Qazaqstan óńiri arqyly Atyraý oblysyndaǵy Inder, Mahambet aýdandarynyń aýmaǵymen aǵyp keledi.
«Qazir Inder aýdanynda ózen jaǵalaýyn bekitý jumystaryna 54 arnaıy tehnıka, 408 qyzmetker jumyldyrylǵan. Aýdanda Jaıyq ózeniniń jaǵalaýyndaǵy qaýipti aýmaqtarǵa jalpy uzyndyǵy 10 kılometr bóget soǵyldy. Bul jumystarǵa 37 950 dana qap paıdalanyldy. Al Mahambet aýdanyndaǵy eldi mekenderdi tasqyn sýdan qorǵaıtyn bógettiń jalpy uzyndyǵy – 80 kılometr. Jaıyq ózeni boıyndaǵy 17 eldi mekende 9 qorǵanys bógeti osal. Olar Taldykól, Beıbarys, Alǵa, Mahambet, Sarytoǵaı, Eski Saraıshyq, Eńbekshil, Esbol jáne Ortaqshyl aýyldary tusynda ornalasqan», dep málim etti Jasulan Bısembıev.
Mahambet aýdanynda sý tasqynynan qorǵaý úshin 56 myń qapqa topyraq qaptalyp, ózen jaǵalaýy bekitildi. Bul jumystarǵa barlyǵy 95 tehnıka, 142 qyzmetker, 1300 erikti jumyldyryldy.
«Al Atyraý qalasynda Jaıyq ózeniniń jaǵalaýyndaǵy 12 aýmaqty bekitý jumystaryna 172 tehnıka tartyldy. Qazir jaǵalaýda bıiktigi 2 metr, uzyndyǵy 7 kılometr bóget salyndy. Bógetke 100 myń qap paıdalanyldy. Bul jumys jalǵasyp jatyr», deıdi ákim orynbasary.
Atyraý qalasynda Jaıyq jaǵalaýyndaǵy jumystardy 5 myńnan astam adam atqaryp jatyr. Onyń ishinde ákimdiktiń, Qorǵanys mınıstriliginiń, Ulttyq ulannyń, Tótenshe jaǵdaılar, Polısııa departamentteriniń ókilderi jumyldyrylǵan. Bul iske 4 myńǵa jýyq eriktiler toby úles qosýda.
Ákim orynbasarynyń pikirinshe, bul áli de jetkiliksiz bolyp otyr.
«Sebebi, 5 sáýirde Orynbor oblysyndaǵy Irıkla sý qoımasynan rekordty mólsherde sý jiberildi. Mundaı sý osy kezge deıin bolmaǵan. Sondyqtan birligimizdi tanytyp, Atyraý qalasyn tasqyn sý apatynan aman alyp qalýǵa jumylýymyz kerek. Bizge ár atyraýlyqtyń kómegi kerek. Bárimiz Jaıyq jaǵalaýyndaǵy bógetti bıiktetip, bekitýimiz qajet. «Kóp túkirse – kól» degendeı, ár azamat bir qap qumdy jaǵaǵa ákelse, úlken beket bolary sózsiz», dedi Jasulan Bısembıev.
